خطِ نستعلیق تُوں بعد برِصغیر وِچ لوک فن دا ودھارا
ہِک ٻئی ڳالھ نستعلیق خطاطی دے متعلق وݙی اہم ہِے۔ او اِے ہِے ڄو پورے برِصغیر اِچ ݙو سو سال پہلے تک فارسی زبان سرکاری زبان دی صورت اِچ موجود ہئی ہِیں سانڳے ݙو سو سال پہلے دے کتابت تھئے ہوئے یَکّے قرآنی نُسخیاں اِچ فارسی ترجمے نستعلیق اِچ لکھے ویندے ہَن۔ بعد اِچ ڄݙاں اردو زبان بݨ تے مقبول تھی گئی تاں اے مسئلہ پیش آیا ڄو اُردو کوں کیڑھے طرزِ تحریر نال لکھیا ونجے۔ بھانویں ڄو خطِ نستعلیق ایران دی ایجاد ہئی اِیں بناء تے خطِ نستعلیق کوں اِی اُردو لکھݨ کیتے استعمال کرݨ دا فیصلہ تھیا۔ ایں ڳالھوں وی ڄو برصغیر دے لوکاں دیاں اکھیں اِچ اے طرزِ تحریر رچیا بسیا ہَا۔ حالانکہ کئی لوکاں نے ایں ڳالھ دی وݙی مخالفت کیتی ڄنہاں اِچ ہندی زبان دے زُعما اُردو کُوں دیو ناگری طرزِ تحریر اِچ لکھݨ دے حامی ہَن۔ ڄݙاں جو مسلم زُعما اُردو لکھائی نستعلیق اِچ لکھݨ دے حامی ہَن۔ ہِیں سانگے اُردو نستعلیق اِچ لکھیجݨ لگی۔ اَتے عربی نسخی خط کُوں وی استعمال کیتا۔ پر وَلدے نستعلیق دی مقبولیت دے عادی تھی ڳئے۔ اَتے وَت ڄݙاں کمپیوٹر دا دور آیا تاں سرائیکی زبان دی لکھت پڑھت کیتے وی لکھاریاں نے اتفاقِ رائے نال ایہو خطِ نستعلیق پسند کیتا اَتے ہِیں دے پروگرام دا سافٹ ویئر بݨایا ڳیا ڄیڑھا ڄو وݙا اَسان ہِے۔ ٻہوں سارے خطاط صاحبان نے سرائیکی زبان اِچ خطِ نستعلیق دے فن پارے لِکھن۔ خطِ نستعلیق دی ایجاد دے ست سو سال بعد ملتان شریف اِچوں ہک نواں طرزِ تحریر ڄیندا ناں ’’خط رعنا‘‘ ہِے۔ ایجاد تھیا ڄیڑھا ڄو پُشتینی خطاط گھرانے دے تخلیق کار اتے دستکار ابن کلیم دی ایجاد ہِے۔ اَتے ایں طرزِ تحریر اِچ عربی، فارسی، سرائیکی، پنجابی اَتے اُردو وی وݙے سوہݨے انداز نال لکھے ویندن اَتے پسند کیتے ویندن۔ خواجہ غلام فرید رحمۃ اللہ علیہ دے کلام کُوں وِی خطِ رعنا اِچ ڈیزائن کر کے لکھیا ڳے ڄیڑھا وَݙا مقبولِ عام ہِے۔[١]
ٻِیا ݙیکھو
لکھوحوالہ جات
لکھو- ↑ از: "ابن کلیم" "ملتان دے لوک فنون وِچ روائتی خطاطی دا ارتقاء" (١٩٧٠ء تُوں پہلاں)، باہتمام: دبستان فروغ خطاطی (رجسٹرڈ)۔ (غیر مطبوعہ سرائیکی مقالہ)۔