سرائیکی لوک ثقافت وِچ روہی

دیوانِ فرید وِچ ٢٢٢ لمبر تے آوݨ آلی لوک کافی "روہی وٹھڑی ٹوبھا تار وے"، آ مل تُوں سینگا یار وے، یارھاں شعراں تے مشتمل اے، کافی دے سبّھے شعراں وِچ روہی وِچ مِین٘ہ تِھیوݨ نال ٹوبھے تار، تھلڑے باغ بہار، مِین٘گھ ملھار، پکھیاں دے چہکار، مٹیاں دے گُھٻکار، ڳاج دے دھدکار تے کھیوݨ دے لسکار دا ذکر مِلدے۔ شاعرِ مناظرِ فطرت حضرت خواجہ غلام فرید سئیں روہی وِچ مِین٘ہ وَسَّݨ یا بارش تِھیوݨ دی منظر کشی جئیں طرح کِیتی اے اِیں طرح دی منظر کشی اَڄ تک کوئی نی کر سڳیا، کافی دا ہِک ہِک بول سونے نال تول گِھنَّݨ دے ݙا دا ہِے۔

خواجہ فرید کُوں روہی نال عِشق ہا، اِنّھاں دیوانِ فرید وِچ سین٘کڑاں جہِیں تے روہی دا ذکر وݙّی سِک، محبت تے عقیدت نال کِیتے، روہی خواجہ فرید دی شاعری دا وݙّا حوالہ تے وݙّا استعارا ہِے، کلامِ فرید وِچ جاہ جاہ تے اساکوں روہی دے ون پونّے ذائقیں دی چَس چوائی اے، آپ دے کلام وِچ روہی دے لئی لاݨے، کرڑ کنڈا، ڄال ڄلوٹے، تے کھپ کھاروں دا ذکر مِلّݨ دے نال نال روہی واس، روہیلیں دے رہن سہن، رسماں رِیتاں، مرجی، خوشی غمی تے ٻُکھ تریہہ دا ذکر ہِک وار نی، وار وار بلکہ کئی سو وار آئے خواجہ فرید سئیں کُوں اپݨی دھرتی اپݨی مٹّی اتے اپݨے وسیب نال بے پناہ محبّت ہئی، ہِک جاہ تسّی تے تتڑی روہی کوں اِیں طرح نذرانۂ عقیدت پیش فرمین٘دِن:

میݙا ملک ملہیر تے مارو تھلڑا

روہی چولستان وی تُوں

ہِک ٻئی جاہ روہی دے پاݨی تے اُون٘دے ہر قطرے کُوں آبِ کوثر، مٹی تے گرد غبار کُوں مشک تے عن٘بر، کرڑ کنڈے کُوں شمشاد تے صنوبر حتّٰی جو خار کُوں وی بہار نال تشبیہہ ݙین٘دِن ملاحظہ فرماؤ ہِک کافی دا سوہݨاں بند:

ہر ہر قطرہ آب ہے کوثر

گرد غبار ہے مشک تے عنبر

کِرڑ کنڈا شمشاد صنوبر

خار دی شکّل بہار دی ہے

ٻیا ݙیکھو  

• لوک قصّہ سیف الملوک دے شاعری تے اثرات۔

• سرائیکی لوک ادب وِچ نور نامہ دی اہمیّت۔

• لوک قصّہ سیفل نامے بارے روایتاں۔

• آ چُݨوں رَل یار سرائیکی لوک گیت۔

• لوک قصّہ سیف الملوک وِچ ثقافتی رنگ۔

ٻاہرے رابطے

• حضرت خواجہ غلام فریدؒ دا اُردو وِچ تعارف
• جھوک پبلشرز دے کتاباں۔۔ ۔ ۔۔ ۔ ۔ ۔ ۔ ۔ ۔