لوک قِصّے تے لوک کہاݨیاں دی اہمیّت

لوک قصّہ تے لوک کہاݨیاں اساݙی حیاتی تے اثر انداز تھیوݨ والے طرزِ احساس ، طرز فکر تے طرزِ عمل کوں بیان کریندے تے خواہشاں کوں ہر حالت وچ پورا کریندے ۔ انہاں کہاݨیاں دا گاٖنڈھا حیاتی نال کریندے ہوئے

لوک قصے تے لوک کہاݨیاں اپݨے فنی تے ادبی ، گھٹکیاں دے ٻاجھوں وی ایجھیاں نیں ہوندیاں جو اُنہاں کوں ہِکے لنڳی غیر اہم سمجھ گھدا ونڄے ۔ مونڈھی تے قدیم قصے جیڑھے عام طور تے کہیں قوم دے وچ مقبول تے مشہور تھیندن۔ انہاں وچ ٻہوں ساریاں وکھو وکھ چساں بھریاں ہویاں ہوندیاں ہن۔ ایہ قصے کہیں اوپرے جہان اِچ نِسردن۔ بھل اوں قوم دے شعور تے تخیل دا ودھار کریندن۔ اِنہاں وچ اوں قوم دے تخیل دی مونڈھی ، ملوک تݙ نظردی ہے ۔ انہاں وچ اوں قوم دے شعور دی پہلی معصوم تتلاہٹ سُݨائی ݙیندی ہے ۔ انہاں وچ ڈھیر ساریاں اوشئیاں نظر آندیاں ہن جنہاں وچ او قوم شروع لا توں دلچسپی گھندی ہئی جیڑھی انہاں دے دماغی یا جذباتی طاقتاں تے زور دار محرکات دا کم کریندیاں ہن۔ انہاں وچ او ساریاں ڳالھِیں نظردیاں ہِن جنہاں تے انہاں کوں پکا یقین ہئی جنہاں کوں حق سچ دیاں ڳالھِیں سمجھدے ہن۔ انہاں وچوں او سارے تصورات ملدن ۔ جیڑھے چھڑے تصور اِی نہ ہن بھل ایں خیال وچ ہووݨ آلے واقعات کوں ڈھیر ترکڑے تے پکے ٹھکے ہن ۔ انہاں وچ مافوق الفطرت عناصر واقعات یا کئی کردار ، وہم و گمان تے او مذہبی عقائد وی نظردن جنہاں کوں او قوم ٹھیک سمجھدی ہئی ۔مُکدی گاٖلھ قصے کہاݨیاں وچ کہیں قوم دی مونڈھی مجموعی اَتے انہاں دے لوکیں دی انفرادی کوششاں دی سُنڄاݨ تھی سڳدی ہے۔

ملک عبداللہ عرفان اپݨی کتاب "ناتھ جی" دے دیباچے وچ قصے دی اہمیت بارے مُکدی ڳالھ کریندن:

"قصہ ماݨس دے وہاݨے ݙینہاں دے ݙُکھ سُکھ دی تاریخ ہے ۔ وسیب واسیاں دے بھاڳاں تے ویکیاں دی پوتھی اے۔ قوماں دے سِݨپ ڳلھپ دا ست ہے، سوچاں دا سوما ہے، اساݙا دھنا پناہے، پرکھاں دی ݙتی ݙات ہے، پیڑھیاں دا ورثہ ہے اَتے سبھانیں دا آرھی شیشہ ہے جیڑھا اساݙے کنیں ہوندے ہوئیں وی ایں سانگوں کئینی جو لکھت اِ چ نئیں آیا۔"

حفیظ خان لوک قصے دے اہمیت بارے اکھیدن :

"ایہ ہک عام انسانی رویہ ہے جو انسان اوندی ہی ڳالھ سُݨدے، سُݨویندے  تے کریندے جیڑھا اوندے کیتے ٻہوں اہم ہووے یا اہم ریہا ہووی۔"

ٻِیا ݙیکھو

• سرائیکی ادب وِچ لوک قِصّے دی اہمیّت

• لوک قِصّہ کیا ہِے؟

• لوک قصّے دا اساݙی حیاتی تے اثر

• لوک قصّہ تے انسانی حیاتی

• جدید دور اتے لوک قصّے کہاݨیاں

ٻاہرلے جوڑ

• ڈاکٹر خالد اقبال صیب دی لائبریری دا ٻِیا مواد۔ ۔ ۔ ۔ ۔