لوک قصّہ تے انسانی حیاتی
لوک قصہ انسانی حیاتی وچ مضبوط وݨ وانگوں ہوندے جیندیاں پاراں صدیاں دے انسانی تجربات ، شعور اتے حکمت دی زمین وچ گہپیاں ہوندن۔[١]
لوک قصّے دی افادیت بارے سرائیکی دانشور رانا محبوب اختر دا آکھݨ ہے :
"اُنویں تاں قصے دے اتنے معنی تے ،مفاہم ہوندن جتنے قصے کو ں پڑھݨ تے سݨݨ آلیاں دے ذہن اچ آندن پر سارے قصے کہاݨیاں ساݙی سوچ تے خیالات دا پڑݙ و ہوندن ۔حیاتی بارے اساݙا نقطہ نظر ایہ ہے جو لوکاں دی مونڈھی معاشرت دا پہلا مسودہ ، قومی باز گشت ، ذہنی قالب ، بلیغ استعارہ تے جادوبھریا بیانیہ ہے۔ کہاݨی ساݙے جرائم ، نفرتاں ، محبتاں ، فیصلیاں تے تَݨ وَݨ دی تفسیر ہوندی ہے۔ قصہ ساݙی سنڄاݨ تے ساݙے اندر کوں ٻاہر دی دنیا ڄال جُڑیندے۔ ساݙیاں سماجی قدراں دی جالکاری وی ووݨت دا حصہ ہوندی ہے ۔رڈ یارلپلنگ Rdyard Kipling آکھیا ہا جے تاریخ کہاݨیاں وانگوں پڑھائی ویندی تاں لوک اینکوں کݙاہیں نہ وسردے۔ ایں ڳالھ اُتے کئو کروں تاں سدھ پوندی اے جنھاں کوں تاریخ یاد ہووے تاں ول اوخونی تاریخ دے پُکھاابواب دہراوݨ دا موقعہ نی ݙیندے ۔ شایت خوراک ، مکان تے سنگتیاں دے قصے کہاݨیاں انسان دی سبھ توں وݙی ضرورت ہن۔ ساری موسیقی ، ادب تے جھمر داستان گوئی ہے تے اساں ٻالاں وانگوں ایندی چن چیندے تے وݙیاں وانگوں ایں توں سبق سکھدے ہیں۔ ریاست تے میڈیا دی وَٹھ توں پروبھرے ذہن شعورخاب و خیال تے خالق و مخلوق دی دنیا دا قصہ ای مختلف ہے۔ ہک ایجھا قصہ جیڑھا جرائم ، بیماریاں تے موت توں ڈھیرتکڑا ہتھیار ہے۔ لافانی ہومرآپݨے رزمیہ اِچ ہک تکھی انگوری دی شراب جیڑھی دانشوراں کوں اپنے پھیپھڑیاں دی پوری طاقت نال گاٖوݨ کھلݨ تے جُھمرمارݨ تے ایجھیاں کہاݨیاں سݨاوݨ تے مجبور کریندی ہے ۔ ایہ سبھو صحت دی علامت ہن۔ حالانکہ ـ’’اہل قال ‘‘ اینکوں گلہپ آہدن۔ ‘‘[٢][٣]
ٻِیا ݙیکھو
لکھوحوالہ جات
لکھو- ↑ از: سئیں ڈاکٹر خالد اقبال۔ لائبریری۔
- ↑ راݨا محبوب اختر، لوک بیانیہ اور سیاست، لاہور، سانجھ پبلیکیشنز، ۲۰۱۳ء، ص :۷۸
- ↑ از: الطاف ݙاہر ۔ ڳول پھرول لِکّھت: "سرائیکی ادب وِچ لوک قصّے دی اہمیّت تے افادیت"۔ ریسرچ جنرل "نڳال-2" (سرائیکی)۔ سرائیکی ایریا سٹڈی سنٹر، بہاء الدین زکریا یونیورسٹی ملتان جولائی تا دسمبر ٢٠١٩ء تُوں چَھپّے ہوئے تُوں آرکائیو تِھیا ہویا۔