لوک شاعری اَتے لوک نثر دا تذکرہ

سرائیکی غزل جیندے مرتب حیدر قریشی ہن تے ایہہ کتاب ستمبر 1980ء وچ ، جدید ادب پبلی کیشنز خان پور ولوں چھاپی ڳئی ہے تے ایندی چھپائی کیتے ممتاز اکیڈمی ، بھٹہ واہن دا تعاون وی شامل ہے۔ ترے سو دی تعداد وچ ایہ کتاب چھاپی ڳئی ہے۔ سرائیکی غزل دا مزاج ، م ۔ ی قیصرانی دا مضمون تے سرائیکی غزل بارے حیدر قریشی دا مضمون ٻہوں  اہمیت رکھیندن۔ ایہ کتاب ایں بحث کوں واضح کریندی ہے جو شاعری دی صنف غزل سرائیکی زبان وچ لکھی ونڄ سگدی ہے یا کوئے ناں۔ ڈاکٹر سجاد حیدر پرویز ایں کتاب بارے لکھدن:

"سرائیکی غزل حیدر قریشی دی کتاب ہے جینکوں ستمبر 1980ء وچ جدید ادب پبلی کیشنز خان پور نے ممتاز اکیڈمی بھٹہ واہن دے تعاون نال چھاپیا ڳئے۔ 64 صفحات دی ایہہ کتاب، م۔ ی قیصرانی دے ہک مضمون: (’’ غزل تے سرائیکی دا مزاج‘‘ مطبوعہ: ادبی شمارہ نمبر 4 ’’سوجھلا‘‘ اشاعت دسمبر 1979ء) دے جواب وچ لکھی ڳئی ہے۔ جاں جو حیدر قریشی نے م۔ ی قیصرانی دی طرفوں سرائیکی زبان وچ غزل گوئی کوں مسترد کیتے ونڄݨ دے دعوے کوں اپݨے مضمون ’’سرائیکی غزل‘‘ وچ ثبوت دے طور تے 38 شعرا دا سرائیکی غزلاں دا ہک انتخاب پیش کیتا"۔

"سرائیکی کلام مصری شاہ" (1906-1828ء) انہاں دا کلام اتے حالات زندگی بارے تعارف مہر کاچیلوی نے مرتب کیتے۔ ایہہ کتاب پہلی وار 1982ء تے ݙوجھا ایڈیشن، مہر پبلی کیشنز، میر پور خاص توں چھپئے۔

"میرن شاہ": (1898-1858ء) بارے کتابچہ حفیظ الرحمن بہاول پوری نے عزیز المطابع، بہاول پور توںچھاپیئے ایندے وچ شاعر دے حالات تے نمونہ کلام موجود ہے۔

"سرائیکی اور اس کی نثر" دلشاد کلانچوی دی ایہہ کتاب 1982ء وچ مکتبہ سرائیکی لائبریری بہاول پور دی طرفوں چھپی اے۔ جیندے وچ 32 سرائیکی نثر لکھݨ والے لکھاریاں دے حالات و کوائف شامل کیتے ڳئین۔ سرائیکی نثری ادب دے تذکرے دے حوالے نال ایہہ پہلی کتاب ہے۔

"چراغ اعوان" (1145-1090ء) ڈاکٹر طاہر تونسوی دا مرتب کیتا ہویا تذکرہ ہے۔ جیڑھا 1982ء وچ سرائیکی ادبی بورڈ (رجسٹرڈ) ملتان دی طرفوں چھاپیا ڳئے۔ جیندے وچ چراغ اعوان دے حالات، کوائف اتے نمونہ شاعری شامل ہے۔

ٻیا ݙیکھو

• سرائیکی لوک ادب وِچ مرثیہ نگاری

• مینگھ ملہار

• وہن٘دے نِیر اَتے کُجھ ٻئے تذکرہ جات

• سرائیکی لوک ادب دے کُجھ تذکرے

• رت دیاں ہنجوں

ٻاہرلے جوڑ

• سئیں ڈاکٹر خالد اقبال دی لائبریری ݙیکھو

• سئیں ڈاکٹر خالد اقبال دا تعارف انگریزی وِچ

• ڈاکٹر خالد اقبال صیب دی لائبریری دا ٻِیا مواد۔ ۔ ۔ ۔