سرائیکی ٻالاں کِیتے لوک ادب

ٻال پُھل ہِن، پُھل جِتّھاں ہووِن، جیہو جہِے ہووِن اَتے جیڑھے رنگ دے ہووِن ۔ ۔ ۔ پیارے لگدن ۔ ۔ ۔ ٻال اساݙی اَڄ دی مُڑی وی ہِن اَتے کل دا سرمایہ وی، آوݨ آلے دور وِچ ساریاں ذمّہ واریاں اُنّھاں دے سِر تے اَمسِن، اِیں واسطے اساکوں اپݨے ٻالیں دی تعلیم اَتے تربیّت تے سبھ تُوں وَدھ بھال ݙیوݨ دی لوڑ اے۔ سرائیکی سُنڄاݨ دا کَم اَڄ تُوں چالِہیہ سال پہلاں شروع تھئے پر اَساݙے بے سوچ اڳواݨیں اپݨا کَم نکّے ٻال تُوں شروع کرݨ دی بجائے ٻُڈّھے طوطیں کُوں پڑاھوݨ شروع کر ݙِتّا، ٻہوں سارے اساݙے لیڈر تے سوجھوان ٻاہروں سرائیکی سرائیکی اَتے اندروں گھر ون٘ڄ تے اپݨے ٻالیں نال اُردو اَلا تے اُنّھاں کُوں ڳلین٘دے رہ ڳے۔ ڄیکر این٘ویں نہ ہووے تاں چالِہی سال پہلے والا ٻال اَڄ جیڑھی جاہ تے جیڑھے مقام تے ہووے اَڄ اساݙا ہووے ہا، پر امسوس جو اساکوں اپݨے ناں دے وݙّے اڳواݨیں بَھن گھتیے۔

اَڄ اساݙے ٻالیں کُوں ہزار ہا سالیں تُوں سینہ بہ سینہ چلّے آوݨ آلے لوک قِصّے قصولیاں تے ڳاوݨ یاد کینھی، اَڄ اسیݙے ٻالیں کول ڈش ہے، سٹلائٹ ہے، انٹرنیٹ ہے پر لوک اَدب کینھی، اساݙے ٻال اَڄ وی اپݨے لوک ادب کِیتے سِکدے ٻیٹِھن پر اِنّھاں کوں لوک ادب ݙیوݨ والا کوئی کینھی۔ اَساں اپݨے اخبار دے ذریعے "پُھلواڑی" دے ناں تے ٻالیں واسطے چھوٹیاں موٹیاں کوشِتاں کرین٘دے رہ وین٘دوں۔ میݙا بھڑین٘جا نذیر احمد بزمی،  چھوٹا بِھرا فاروق احمد دھریجہ، بھتریڄا محمد شاہد اَتے وݙّا پُتر طاہر محمود دھریجہ "چندر تارے" اَتے "قصّہ قصولی" دے ناں نال وسیب دے ٻالیں کِیتے رسالے وی شائع کرین٘دِن، اِیں طرح اساں جھوک پبلشرز دی طرفُوں پروفیسر شوکت مغل دیاں کتاباں "الف بے ٻٹوا"، "آٹی ماٹی" اَتے ٻہوں ودھ ڳِنتری وِچ قاعدے وِچ شائع کِیتن پر مَیں سمجھداں جو اے کَم ٻہوں تھولا ہِے، ٻالیں واسطے سرائیکی وسیب دے سبھے جماعتیں کوں، سبّھے ادبی اداریاں کُوں، سبّھے شاعریں، دانشوریں، سبّھے لکھاریاں بلکہ وسیب دے ہر نین٘گر تے ہر تِریمت کُوں رَل تے کرݨا چہِیدے۔                              

ٻیا ݙیکھو

• سرائیکی لوک ثقافت وِچ خَجّی دی اہمیّت۔

• قِصّہ کراں پُٹّھا۔

• سرائیکی وسیب دے لوک پہناوے۔

• سرائیکی وسیب دے لوک گھاٻوٹ۔

• سرائیکی وسیب دے لوک مذاہب۔

ٻاہرے رابطے

• جھوک پبلشرز دے کتاباں۔

• سئیں ظہور دھریجہ دا تعارف اُردو زبان وِچ۔۔ ۔۔ ۔ ۔ ۔ ۔ ۔