زنانیاں بطورِ امام

زنانیاں بطورِ امام (اردو: عورت کی امامت)۔ مسلماناں وِچ اِیں بارے وِچ اَنجو انج آراء ہِن جو زنانیاں امامت کر سڳدیاں ہِن یا کائے ناں۔

اہل سنت

ہِک زنانی ݙوجھی زنانی دی جماعت کرا سڳدی ہِے اَتے اِین٘دا طریقہ اِیہ ہِے جو اُوہ ٻِنّھاں زنانیاں دے وِچالے وِچ کھڑوسی، مرداں آلی کار اڳّوں وَدھ تے ناں کھڑوسی، امام ابو داؤد نے سنن ابو داؤد وِچ پُکھ "امامۃ النساء" وِچ لکھیا ہِے جو رسول اللہ صلی اللہ علیہ وآلہِ وسلم امِ ورقہ بنت عبد اللہ بن حارث دے گھر تشریف گِھن ڳئے تاں آپ صلی اللہ علیہ وآلہِ وسلم نے اِنّھاں کِیتے ہِک مؤذن مقرر کِیتا جیڑھا اذان ݙین٘دا ہئی اَتے آپ صلی اللہ علیہ وآلہِ وسلم نے حُکم فرمایا جو تُساں اپݨے گھر آلیاں دی امامت کِیتی کرو۔

عائشہ بنت ابی بکر زنانیاں دی امامت کرین٘دی ہَن اَتے اِنّھاں دے نال ای صف وِچ کھڑون٘دی ہون٘دی ہَن۔

جدید دور دے مثالاں

ہُݨ ڄیکر اَساں اِیہ ڳالھ کروں جو دُنیا بھر وِچ اَڄ کَل دے دور وِچ زنانیاں دیاں مسیتاں وکھرے وکھرے بݨݨ لڳ پئے ہِن جِنّھاں وِچ چین، امریکہ، کینیڈا، یورپ اَتے ٻئے مغربی مُلخاں وِچ اِیہ رِیت عام تِھین٘دی وین٘دی ہِے جو اُتّھاں زنانیاں کِیتے وَکھرے مَسِیتاں بݨائیاں وین٘دیاں پئیاں ہِن تاں اِتّھاں اِیہ ڳالھ وی ٻہوں اہم ہِے جو اِنّھاں وَکھرے مَسِیتاں وِچ کئی جائیں تے امامت دا کَم کار وِی زنانیاں دے سُپرد ہِے۔ ٢١ ویں صدی وِچ، ٻہوں سارے مُلخاں وِچ اسلام دے اندر لبرل تحریکاں دے حِصّے دے طور تے زنانیاں دی اڳواݨی یا صرف زنانیاں کِیتے بݨائیاں ڳئیاں مسیتاں کوں ݙِٹّھا ون٘ڄ سڳین٘دا ہِے۔ چین وِچ صرف زنانیاں کِیتے وَکھرے مَسِیتاں مسلم بِیادریاں نے بݨائیاں ہَن۔ منگ ٹَٻَّر دے مُکَّݨ اَتے چنگ ٹَٻَّر دے اَغازی دور وِچ، زنانیاں نے اپݨیاں مَسِیتاں بݨاوݨ دا اَغاز کر ݙِتّا ہئی۔ چین وِچ سبھ تُوں پُراݨی محفوظ رہ ون٘ڄݨ آلی زنانیاں دی مَسِیت، کافینگ دی وانجیا ہٹونگ مَسِیت ہِے، جین٘دی اُساری دی تاریخ ١٨٢٠ء ہِے۔ چینی ٻولی وِچ اسلامی عالمہ زنانیاں کُوں  آخوند (女阿訇) آکھیا وین٘دا ہِے۔  اِین٘ویں اِیہو جئیں ٻہوں سارے مثالاں اَساکوں امریکہ اَتے کینیڈا دے وی مِلدے ہِن جیویں جو کینیڈا دی زنانیاں دی مَسِیت ٹورنٹو وِچ اپریل ٢٠١٩ء وِچ اُساری ڳئی ہئی۔ مَسِیت سینٹ ٹرینٹی پال یونائیٹڈ چرچ وِچ جاء دے نال شروع تھئی۔ اِیں مَسِیت وِچ وی یقینی طور تے آکھیا ون٘ڄ سڳین٘دے جو زنانیاں دی امامت ای رائج ہے۔

ٻِیا ݙیکھو

• زنانیاں دیاں مسیتاں
• اسلام وِچ زنانیاں
• تِریمت مَسِیت امریکہ
• اسلام دیاں عالمہ زنانیاں دی تن٘دِیر
• قُرآن مجید وِچ تِرِیمتاں دا ذکر