دستکاری وِچ ہَتھ اتے ساہ دی طاقت
لوک فن خطاطی دے وِچ قلم چلاوݨ اِچ اَتے لفظاں دے بݨاوݨ اِچ ہتھ اَتے ساہ دی طاقت اَتے زور کوں وَݙا دخل حاصل ہِے۔ لفظ دا کوئی حصہ موٹا ہوندے اَتے کوئی حصہ بَرِیک۔ اینویں قلم دی گردش وی کݙھیں تیز ہوندی ہِے اَتے کݙھیں سُست ہوندی ہِے۔ ہِیں سانڳے حرفاں دے سارے حصّیاں کوں نکھار تے اَتے نمایاں کر کے لکھݨا ہتھ دی قوّت تے منحصر ہِے۔ تُساں کݙاھیں کہیں خوشنویس کوں لکھدا ݙیکھو تاں اے عقدہ کھل ویسی۔ نستعلیق اِچ ’ج‘ یا ‘س‘ دا دائرہ پانوݨاں ہووے تاں ساہ روکݨاں پوندے لمبی ’ب‘ یا ش دی کشش پاوݨ ویلے وی ساہ گُھٹ تے لکھݨاں پوندے۔ نِیں تاں لفظ وِگڑ ویندے۔ دَھڑک آویندی ہِے۔ ہِک زمانہ جاݨدے جو مہاندرے خطاط سئیں تاج الدین زرّیں رقمؔ باقاعدہ اکھاڑے اِچ پہلوانی کریندے ہَن آپݨے ساہ کوں پکّا کریندے ہَن جینویں گلوکار ساہ کوں پکا کرݨ دے حیلے کریندن۔ اینویں اِی خطاط و خوشنویس کیتے وِی ساہ کوں پکا کرݨ اَتے ساہ ہار کے لکھݨ لازم ہِے تاں وَنج تے لکھائی دا صحیح رزلٹ نکل سڳسی۔
ڄینویں ہِک ٻندے کِیتے صحت ہووَݨ اہم ہِے پر جیکر صحت دے نال نال حُسن اَتے خوبصورتی وی ہووے تاں وَت سونے تے سُہاگہ آلی گاٖلھ ہوسی، اینویں ہِک خطاط (قلمکار / دستکار) دی تحریر اِچ اُصول وی ہووے اَتے صَفائی وی ہووے اَتے جیکر تحریر اِچ جاذبیت دی ہِک خاص شان اَتے خاص اَدا وِی ہووے تاں ٻہوں سوہݨی گاٖلھ ہوسی۔[١]
ٻِیا ݙیکھو
لکھوحوالہ جات
لکھو- ↑ از: "ابن کلیم" "ملتان دے لوک فنون وِچ روائتی خطاطی دا ارتقاء" (١٩٧٠ء تُوں پہلاں)، باہتمام: دبستان فروغ خطاطی (رجسٹرڈ)۔ (غیر مطبوعہ سرائیکی مقالہ)۔