بھوٹان وِچ زنانیاں

بھوٹان وِچ زنانیاں (اردو: بھوٹان میں خواتین) (انگریزی: Women in Bhutan)۔ بھوٹان دے بارے وِچ ہِک عام تأثر اِیہ ہِے جو اِیہ ہِک بدھ مت دی اکثریتی مملکت ہووݨ دے نال نال ہِک رفاہی مملکت ہِے، جِتُّھوں دے رہوݨ آلے عام طور تے خوش حال ہِن۔ تاہم جدید تحقیق نال پتّہ لڳیا ہِے جو بھوٹان وِچ زنانیاں ظلم تے ستم دا شکار رِیہاں ہِن۔ اِنّھاں اُتّے خصوصی جسمانی تشدّد دے واقعے کثرت نال رونما تِھین٘دے ہِن اَتے اِیہ واقعے ٻہوں پھیلے ہوئے ہِن۔

بھوٹان وِچ زنانی دی ہِک تصویر

زنانیاں دے حقوق

زنانیاں دے حقوق اَتے اِنّھاں دے تحفّظ کِیتے ہِک غیر سرکاری ادارہ "رینیو" بھوٹان وِچ سن ٢٠٠٤ء توں کَم کرین٘دا پِیا ہِے۔ اِیہ اِدارہ ٢٠١٦ء تئیں زنانیاں اُتے مار کُٹ دے ٤٠٠٠ معاملیاں دے نشان دہی کر چُکیا ہِے۔ اِیں ادارے دے ٢٤٠٠ توں وَدھ رضاکار زنانیاں اُتے مار کُٹ دے خلاف اَواز چین٘دے ہِن، اَتے معاشرے وِچ اِیں بارے وِچ اَگاہی پھیلاوݨ کِیتے کوشِتاں کرین٘دے ہِن۔ اِیں ادارے دی ہِک رضا کار ݙسین٘دی ہِے جو اِیہ اندازہ لایا ڳیا ہِے جو بھوٹان دی ٧٤ فیصد زنانیاں جسمانی مار کُٹ دا شکار رِیہاں ہِن۔

عالمی صنفی درجہ بندی

صنفی فرق دی عالمی درجہ بندی رپورٹ ٢٠١٩ء دے مطابق بنگلہ دیش ٥٠، نیپال ١٠١، سری لنکا ١٠٢، بھارت ١١٢ ویں، مالدیپ ١٢٣، اَتے بھوٹان ١٣١ ویں لمبر تے ہِے۔ ماہرین دے مطابق، ١٥٣ مُلخاں وِچ پاکستان دا ١٥١ واں لمبر اُتے ہووݨ وَدھ چِنتا دا باعث ہِے۔

زنانیاں کوں اختیار آلا بݨاوݨ

بھارت دے گھروڳے صارفین دے استعمال آلے آلات بݨاوݨ آلی مہان٘دری کمپنی اوشا انٹرنیشنل لمیٹڈ نے جامع ترقی دے مقصد نال بھوٹان وِچ تارائین فاؤنڈیشن دے تعان نال سلائی سکول پروگرام ٢٠١٤ء وِچ شروع کِیتا ہِے۔ اِین٘دے تحت تقابلی اصول تے ضوابط دی بنیاد اُتے چُݨیاں ڳئیاں وِیہہ زنانیاں کوں تربیت کار دے طور تے مقرر کرݨ کِیتے ١٠ ݙیہاڑیاں دی تکنیکی تربیت ݙِتّی ویسی۔

ٻِیا ݙیکھو

• بھوٹان
• زنانیاں کوں اختیار آلا بݨاوݨ
• زنانیاں دے حقوق