ہِک درد مند دی ہٻڑاس
اِیہ سئیں ابن کلیم احسن نظامی دے بارے وِچ "سیئں ظہور دھریجہ" دِی ہِک سوہݨی لِکّھت ہِے۔ ملاحظہ فرماؤ:
خِطّۂ سرائیکستان دی تریخ اتنی پُراݨی اے ڄتنی کہ انسانی تریخ، خطۂ اوچ شریف تے ملتان سرائیکی علاقے دی عملی ادبی تے ثقافتی قدامت دِیاں زندہ تے ڄِیندیاں جاگدیاں مِثالاں ہِن۔ سرائیکی تہذیب دیاں ڄڑھاں اِتِنیاں ترکڑیاں تے مضبوط ہِن ڄو مخالفت دے ہزار جھکڑ جھولیاں دے باوجود سرائیکی زُبان تے تہذیب کُوں ختم نی کِیتا ونڄ سڳیا۔ بالا دست طبقے ہِک خوفناک سازش دے تحت سرائیکی علاقے کُوں صَدیاں تُوں اُندے لِسانی تہذیبی تے جغرافیائی حقوق تُوں محرُوم رکھیندے پَین۔ ١٨١٨ء اِچ رنجیت سنگھ دے حملے دے بعد سَرائیکی علاقے نال ظلم زیاتی تے ݙِڈھپ دا وادھا تھِی ڳے۔ ݙُکھ دی ڳالھ اِے ہِے ڄو لعنتی دَجّال تے قابلِ نفرت جرنیل رنجیت سنگھ دے کافرانہ عمل دے بعد وِی مسلمان بھرانویں وِی سرائیکی علاقے نال کوئی گٹکی نی کِیتی۔ زِیادتیاں کرݨ وَالیئں وچ ٻاہر دے حملہ آوریں دے ایخبٹ وِی شامل ءِن تے سرائیکی دھرتی دے ناخلف تے انگریزیں دی معنوی اولاد وِی شامِل اِے، سرائیکی لوکیں دے ݙُکھ درد، کرب، کشالے محرومیاں تے زیادتیاں جڈݨ حد توں وَدھ ڳن مصیبت دے مارئیے لوک غمیں تُوں ناسیں تار تھِن تاں دھرتی واسیاں دے ترجمان شاعراں نے محرومیاں کُوں "سرائیکی لوک ادب وِچ سرائیکی مزاحمتی شاعری" دی زبان ݙِتی اِے۔ خطۂ سرائیکستان دے ݙُکھاں دی ہٻڑاس ڄداں ٻاہر آئی اے تاں ایکُوں سئیں ابن کلیم احسن نظامی دی کتاب دا ناں ݙِتا ڳے۔ سئیں ابنِ کلیم ڄتنے چنگے خطاط تے آرٹسٹ ہِن،اُتنے چنگے انسان وِی ہِن،انہاں کُوں اپݨی ماء دھرتی، ماء ٻولی،تے ماء ٻولی دے لوکاں نال سچّا پیار ہِے، اِیں پیار دا اظہار انہاں دِی شاعری تُوں تھِیندے، انہاں دے تحریریں دے فنی رموز بارے میں کُجھ فی ڄاݨدا، البتہ انہاں دے جذبے دی سچائی، اپݨی مٹٰی نال پیار دِی رِیت تے ظلم دے خلاف کلمۃ الحق بلند کرݨ دے اسلامی فرض دی ادائیگی کُوں سلام پیش کرینداں، خداوندِکریم اپݨے حبیب پاکؐ صدقے انہاں دی توفیق کُوں مزید فرماوے۔ آمین [١]۔
ٻِیا ݙیکھو
لکھوحوالہ جات
لکھو- ↑ از: ظہور دھریجہ (چیف ایڈیٹر: روزنامہ جھوک ملتان۔ "ہٻڑاس" (سرائیکی وِچ موضوعاتی تے مزاحمتی نظماں)۔ گُلِ رعنا ادب سوسائٹی ملتان۔ صفحہ ٨١، ٨٢