٧٥٢ ہجری دے سرائیکی لوک اشعار

نور نامہ تُوں بعد اِیں علاقے دی زبان دے ݙُو نمونے ٧٥٢ ہجری دے ملدِن۔ ریاست بہاولپور وِچ صادق آباد دی کارداری وِچ ہِک پُراݨے شہر دے کھنڈرات پتن منارا دے ناں نال مشہور ہِن۔ اِیں شہر دا ناں پتن پور ہا۔ اے سمرائیں دا دارالخلافہ ہا تے سمرائیں دا آخری راجہ ھمیر (امیر یا ارمائیل) دا حاکم ہا تے اپݨی سخاوت دی وجہ توں مشہور ہا۔ اُوں ہِک چرن کُوں جینکُوں سوامی آکھدے ہن کُجھ گھوڑے انعام وِچ ݙتّے پر پتن پور وِچ اُون٘دے گھوڑے چوری کر گھدے ڳے۔ چرن کُوں یقین ہا جو اُوندے گھوڑے ھمیر تے اُون٘دے وزیر دے آکھݨ تے چوری کِیتے ڳئن۔ اُوں ھمیر دی ھجو وِچ کُجھ لوک اشعار لکّھے جیڑھے سارے ملک وِچ کِھنڈ ڳئے۔ اُنّھاں شعریں دے ترائے مصرعے اے ہِن:

دھاڑی دھوڑا رائے جینہہ چرن سانکھیا

پتن، پٹیجو تھیو سیج وٹایو راہ

ہمیرا پورا راج نہ کندا سمرا

ترجمہ: "لٹیرا ہِے دھوڑا رائے جئیں چرن کُون لُٹ گِھدّا۔ پتن برباد تھی ون٘ڄے تے دریا سیج اپݨا رستہ تبدیل کر ون٘ڄے۔ ہمیرا سرا پورا راج نہ کر سڳے"۔ 

ھمیر دی تاریخِ وفات ٧٥٢ ہجری ہِے، اِتُّھوں پتہ لڳدے جو شعر ٧٥٢ ہجری تُوں وی پہلے دے ہِن۔ تاریخ فیروز پور دا ݙُوجھا نمونہ اُو مشہور جملہ ہِے جیڑھا تاریخ فیروز شاہی شمس سراج عفیف وِچ ملدے جو:

برکت شیخ پٹھا، ہِک مؤا ہِک نٹھا

یا

برکت شیخ تھیا۔ ہِک مؤا ہِک نہا

اے ݙُون٘ہیں لوک جُملے سرائیکی زبان دے ہِن، پر پہلا زیادہ صحیح مَلُوم تِھین٘دے۔ اے اُوں واقعے ݙے اشارہ کرین٘دے جݙݨ سلطان محمد تغلق سمراؤں دے شہر ٹھٹھہ تے فوج کشی کِیتی پر بیمار تھی تے واپس چلا ڳیا۔

ٻیا ݙیکھو

• ملتان، لوک تہذیب تے روحانیّت دا مرکز۔
• سرائیکی لوک ادب وِچ نور نامہ دی اہمیّت۔
• اُردو دی ماء۔
• سرائیکی زبان دا قدیم ادب۔
• سرائیکی دا معنیٰ۔

ٻاہرے رابطے

• جھوک پبلشرز دے کتاباں۔
• سئیں ظہور دھریجہ دا تعارف اُردو زبان وِچ۔ ۔ ۔ ۔۔ ۔ ۔ ۔ ۔ ۔