نوڑ وَٹ

سرائیکی لوک کھیݙاں وِچ اِیں کھیݙ دے کھیݙݨ ویلے ہِک دائرے وِچ نِٹھ تے ٻَہہ وین٘دِن، ہِک کھݙاری پٹکے کُوں وَٹ ݙے ݙے تے اُوکُوں کوڑا بݨا گِھن٘دے، وَل دائرے وِچ ٻیٹھے ہوئے کِھݙاریاں دے ٻاہروں ٻاہروں پِھردا رَہن٘دے تے اِیں خیال وِچ رہن٘دے جو کوئی کھݙاری غفلت وِچ ٻیٹھے تاں وݙی چالاکی نال چُپ کر تے اُون٘دے پِچُّھوں کوڑا رکھ ݙین٘دے تے اپݨاں چکّر پورا کرݨ وِچ لڳ وین٘دے، ڄیکر کہِیں طرح اِیں غافل کِھݙاری کُوں وی پتہ لڳ وین٘دے تاں اُوہ جلدی جلدی پٹکے کُوں چا گِھن٘دے تے رکّھݨ والے دے پِچُّھوں جِہڑا جو اَپݨاں چَکّر پورا کرݨ دی کوشِت وِچ ہون٘دے، بَھڄ پون٘دے۔ اُون٘دے چَکّر پورے کرݨ کنُوں پہلے اُوں کنے پُڄ وین٘دے تاں اُوکُوں کوڑا مرین٘دے تے مرین٘دا رہن٘دے، ڄے توڑِیں اُوہ اُون٘دی خالی کِیتی ہوئی ڄاہ تے نِھیں ٻَہہ وین٘دا۔ ڄیکر غافل کِھݙاری کُوں پَتّہ نِھیں لڳدا تاں اُون٘دے پِچُّھوں کوڑا رکّھݨ والا بَھڄ تے چکّر مار تے کوڑا چین٘دے تے اُون٘دے نال غافل کِھݙاری کُوں مرین٘دے تے اُٹھین٘دے تے باقی کِھݙاریاں دے ٻاہروں چَکّر مروین٘دے تے اُوکُوں کوڑے نال خوب کُٹّی رکھدے۔ اِیں توڑِیں جو اُوہ وَلا اپݨی ڄاہ تے آ ٻَہن٘دے۔ گویا اِیں طرح غافل کِھݙاری کُوں اُون٘دی وسلائی دی سزا ݙِتّی وین٘دی ہِے۔ اے ٻہوں چَسولا کھیݙ ہِے تے اِین٘دے وِچ سارے کِھݙاری شامل تِھی وین٘دِن۔ اِیہ کھیݙ ٻہوں ہُشیاری تے چَلاکی دا کھیݙ ہِے۔ اِیں کھیݙ وِچ مار کھاوݨ والے کِھݙاری کُوں کَوَدن تے نِکمّا سمجھا وین٘دے تے باقی سارے سنگتی اُون٘دیاں کِھلّاں کرین٘دِن۔ اِیہ ایسا کمال دا کھیݙ ہِے جیڑھا چھوہَر اَتے چھوہِرِیں ݙون٘ہائیں وِچ مقبول ہِے۔  

ٻیا ݙیکھو

• ٻالیں دیاں لوک کھیݙاں۔

• ہڑبھچ۔

• لُک چھپ۔

• گُݙّی گُݙّے دی شادی۔

• شیدݨ۔

ٻاہرلے جوڑ

• جھوک پبلشرز دے کتاباں۔

• سئیں ظہور دھریجہ دا تعارف اُردو زبان وِچ۔۔ ۔ ۔۔ ۔ ۔ ۔ ۔ ۔