لُک چھپ

اے کھیݙ شہراں تے وستیاں دے ٻالاں کُوں ݙاڈھی بَھمدی اے، پِڑ اُتّے یعنی کھیݙ دے مرکز والی جاء تے ہِک کھݙاری دِیاں اَکّھیں اصلُوں بند کر ݙِتّیاں وین٘دِن تے باقی سارے کِھݙاری اِݙّے اُݙّے کہِیں نہ کہِیں اُوٹ وِچ اوڈھر تھی وین٘دِن، لُک وین٘دِن، ہِک کھݙکار "کُوکڑی" مرین٘دے تاں جو اُوں کِھݙار کُوں جِین٘دیاں اَکّھیں بند کر ݙِتّیاں ڳیاں ہَن، اندازہ تِھی ون٘ڄے جو باقی کِھݙاری کیڑھے کیڑھے پاسے لُکیے ہوئے ہِن۔ چنانچہ جیڑھے ویلے اُون٘دیاں اَکّھیں تُوں پَٹّی ہَٹا ݙِتّی وین٘دے تاں اُو لُکیاں ہوئیاں کِھݙاریاں دی ڳول پھول وِچ لڳ وین٘دے۔

اُݙّوں لُکیے ہوئے کِھݙاریاں وِچُوں جِیکُوں جِیکُوں موقع مِلدے اُو ٻَچ ٻَچا تے بھڄ تے پِڑ تے آ کھڑدے۔ اِیں طرح اُوہ پُڳ وین٘دے۔ ہُݨ اُوکُوں پکڑݨ دا کوئی فَیدہ نئیں تِھین٘دا۔ اِیویں ٻئے کِھݙاری وی موقع پا تے بھڄ دُھرُکّ وِچ ڳول پھول وِچ وݙا مزا گِھن٘دِن۔ ڄیکر کوئی کِھݙاری لُکیا ہویا لَبھ پووے تے پکڑِیڄ پووے، یا پِڑ اُتّے سارے کِھݙاری اپݨیاں اپݨیاں سنڳتیاں دے ہَتھ چھوڑ تے جلدی جلدی خود آپݨے ہَتّھاں اُتّے ݙوجھا ہَتّھ پُٹّھا یا سِدّھا رکھ ݙین٘دِن وَل ڳِݨیا وین٘دے جو پُٹّھے ہَتھ والے کِتّی کِھݙاری ہِن اَتے سِدّھے ہتھ کِتّی کِھݙاریاں نے رکّھے ہِن۔ چنانچہ جیڑھی حالت وِچ رکھیے ہوئے ہَتھ وَدھ ہون٘دِن اُوہ پُڳ وین٘دِن یا جِت وین٘دِن تے باقی رہن٘دے کِھݙاریں ولا ولا کھیݙدِن۔

ہُݨ ݙیکھو جو اِیہ کِتّی سوہݨاں کھیݙ ہِے اَتے اِیں کھیݙ وِچ ٻالاں دے ہِک ٻئے کُوں لبّھݨ / ڳول پھرول / ڳویڑ کرݨ وِچ کِتّی سُݨھَپ جِیکُوں انگریزی لوّظ سسپنس (Suspense) دے مثبت پان٘سیاں نال اندازہ کِیتا ون٘ج سڳدے اَتے ٻالاں دی جسمانی بَھڄ دُھرُک وِی اِین٘دے وِچ ٻہوں کمال دی ہِے۔ اَتے ٻالاں دا تِکّھا / چُست پَن وی اِیں کھیݙ وِچ ٻہوں اہم اَتے وَدّھݨ کار تِھی وین٘دے۔

ٻیا ݙیکھو

• ٻالیں دیاں لوک کھیݙاں۔

• ہڑبھچ۔

• ڳُڈّی ڳُڈّے دی شادی۔

• قِصّہ قصولی۔  

• ٻالیں دیاں لوک نظماں۔

ٻاہرلے جوڑ

• جھوک پبلشرز دے کتاباں۔۔ ۔۔ ۔ ۔ ۔ ۔ ۔