قِصّہ قصولی

نِکّے ٻالاں دا سرائیکی لوک ادب انٹرنیٹ تے تاں ٻہوں گَھٹ ہِے پر اساݙے پوتھیاں اَتے لائبریریاں بھرے پئے ہِن۔ اَڄ اساں تُہاکُوں ٻالیں بارے کُجھ لوک قِصّے اَتے کُجھ لوک ڳاوݨ پیش کریندوں تاں جو ٻال اپݨے اصل ادبی سرمائے دی چَس چاوݨ اَتے اپݨی اصلی مُڑی تے میراث کُوں ہَتھیکا کرݨ دی کوشِت کرِݨ۔ ہِک پُراݨی ٻالاں دی نظم دی صورت وِچ سرائیکی لوک قِصّے "قِصّہ قصولی" دا رنگ ݙیکھوَ۔ ایہ قِصّہ اساݙیاں ٻُڈھڑیاں خصوصاً نانیاں ݙاݙیاں اساکُوں سݨوین٘دیاں ہَن۔

قِصّہ قصولی (لوک نظم)

قِصّہ قصولی

مر ڳیا پولی

پولی دی پان

چا ڳیا درکھان

درکھان دی ڈوئی

چا ڳئی چڑھوئی

چڑھوئی دا بَھت

چا ڳیا جَت

جَت دا ٹُکّر

چا ڳیا کُکّڑ

کُکّڑ دا مور

چا ڳیا چور

چور دی جُتّی

چا ڳئی کُتّی

کُتّی دا شور        

بھڄ ڳیا چور

چور دی ڳاں

کرے بھاں بھاں

ڳاں دا چَم

آیا مَنڈے موچی دے کَم

اِین٘ویں اِی نِکّے ٻالاں دی ہِک ٻئی لوک نظم ݙیکھو جین٘دے وِچ مِٹّی کُوں ورتیا ڳیا ہِے۔

گُھب گُھب مٹّی

گُھب گُھب مٹّی

چھاہ تیݙی کھٹّی

سونیں دا نَہیلا

مکھݨ تیݙا پیلا

سوناں ڳیا پار

گھن آیا کُنوار

کنوار ٻیٹھی چِھکّے تے

چِھکّا ڳیا تُرٹ

کُنوار ڳئی پُھٹ

اِیہو جئیں ٻہوں سارے نظماں اساݙے سرائیکی لوک اَدب وِچ ٻالاں کِیتے لِکّھیاں ہوئیاں مِلدیاں ہِن جیڑھیاں سِینہ بہ سِینہ ٹُردیاں آن٘دیاں ہِن۔ اِنّھاں نظماں وِچ سرائیکی وسیب دے لوکاں اَتے وسیب دے کِرداراں کُوں اَنجو انج ورتیا ڳیا ہِے جو بندہ پڑھ تے حریان تے شَشدر رہ وین٘دے۔

ٻیا ݙیکھو

• ڳان٘مݨ سچّار۔

• سرائیکی وسیب دے لوک پہناوے۔

• ٻالیں دیاں لوک نظماں۔

• سرائیکی وسیب دے لوک مذاہب۔

ٻاہرلے جوڑ

• جھوک پبلشرز دے کتاباں۔

• سئیں ظہور دھریجہ دا تعارف اُردو زبان وِچ۔۔ ۔ ۔۔ ۔ ۔ ۔ ۔ ۔