مطبوعہ سرائیکی ڈرامے
سرائیکی وسیب وچ انجو انج تہواراں، میلیاں ٹھیلیاں، شادی خوشی دے مواقع اُتے نقلی ٹولیاں، تماشے وال، بھنڈ، آپس وچ مختلف کرداراں دا روپ دھار کے جگت، وکتی بازی کریندے ہن۔ ڈرامے دی ایہ صورت منڈھ قدیم کنوں اڄاں تک ٹردی پئی ہے۔ سرائیکی زبان وچ منظوم ڈرامہ ’’ہیر رانجھا‘‘، سسّی پنوں، سوہݨی مہیوال، لیلیٰ مجنوں، مرزا صاحباں، سمّی راول، لوک داستاناں اُتے مشتمل ہوندا ہا۔ اِنّھاں وِچُوں کُجھ ڈرامیاں کوں کتابی شکل وِچ چھاپ تے عام لوکاں دے سامھݨے وی گِھن آیا وین٘دا ہِے۔ اِیہو جئیں کُجھ مطبوعہ سرائیکی ڈراما دیاں مثالاں اِیہ ہِن:
مطبوعہ سرائیکی ڈرامیاں وچ منشی غلام رسول، مسرت ملتانی دے ݙو ڈرامے ’’خلیل یہودی‘‘ تے ’’عرب دا مسافر‘‘ عرفان پبلشرز، ڈیرہ غازیخان دی طرفوں ۱۹۹۶ء وچ نویں سروں چھپیٔن۔
سرائیکی وسوں دے مہاندرے شاعر، رحیم طلب دے ڈرامیاں دی کتاب ’’زمین اسمان‘‘ سرائیکی ادبی مجلس، بہاولپور دی طرفوں ۱۹۹۶ء وچ شائع تھئی۔ ایں کتاب وچ ست ڈرامے شامل ہن۔ انہاں ڈرامیاں دے موضوعات دیہی سماج دے رشتے ناطے تے اِتھ مسائل کوںبیان کریندن۔
’’غلام سکندر غلام، سرائیکی ڈرامے دا پہلا لکھاری ہے او بھکر دا رہݨ والا ہا۔ ݙوجھا ڈرامہ نگار پیرݨ ملتان ہے انہاں دے بعد منشی کریم بخش واصل، کریم بخش بورانہ، حسرت ملتانی، اللہ یار پُر جوش، عبدالرشید، مولوی قادر بخش گلزار، نور محمد نورݨ گدائی تے قادر بخش دلسوز دے ناں آندن۔ جنہاں سرائیکی ڈرامے/ ناٹک لکھیئے۔‘‘ [١]
مقبول عباس کاشر دے ریڈیو پاکستان ملتان توں نشر تھیوݨ والے ڈرامیاں دی کتاب ’’گونگیاں کندھاں دا شور‘‘ ۱۹۹۸ء وچ شائع تھیا جیندے وچ ۵ ڈرامے شامل ہن۔ ۲۰۰۳ء وچ حفیظ خان دے سرائیکی ڈرامیاں دی کتاب ’’خواب گلاب‘‘ شائع تھیا۔[٢]
ٻیا ݙیکھو
لکھوحوالہ جات
لکھو- ↑ ڈاکٹر طاہر تونسوی، ’’سرائیکی ادب: ریت روایت‘‘، ملتان، بیکن بکس، گلگست کالونی، اشاعت ۲۰۱۰ء، ص: ۱۵۳
- ↑ از: سئیں ڈاکٹر خالد اقبال۔ تحقیقی مقالہ۔
۔ ۔ ۔ ۔ ۔ ۔ ۔