عہدِ رسالت مآب سرورِ کائنات حضرت محمد ﷺ نظم
عہدِ رسالت مآب سرورِ کائنات حضرت محمد ﷺ لکھو
فجُور و فِسق اَتے کُفر و شِرک دا گھر گھر وِچ پَسارا ہَا!
عرب کِیا سَئیں جَہلیّت دَا کُل جگ تے اَندھارا ہا
تاں یَکدم بَحرِ رحمت اِچ خداوندا دے جوش ڄو آیا
محمد ﷺ ابنِ عَبداللہ کُوں چا مبعُوث فَرمایا
سَبق توحید دَا اوّل ݙِتّا سرکار نے کُفّارِ مَکہ کُوں
پَسند آیا نہ اے ابو جہلؔ تے سٻھے اشرارِ مَکہ کُوں
مسلماناں کُوں ݙِینوݨ لڳ پئے اُو تکلیفاں ٻَہُوں
جَھلیندے رَہ ڳئے مَن رَبّ دی رَضا اِیہہ اَذیتاں ٻَہُوں
کئی پَروانیاں نے دین دی خاطر گھر بار کُوں چھوڑیا
لُکے وَنڄ ملک حَبشہ وچ نہ مُنہ توحید توں موڑیا
ڄَݙاں طائف دے بَزاراں وِچ نبی سئیں وعظ فرمایا
کافراں پتھر وَسَائے، سوہݨے کُوں وَدھ ݙُکھ پُچایا
جنابِ رحمۃً لِلعٰلمین دِیاں وَاہ کیا کیا وَفائیں ہَن
اُݙوں پتھر پئے وَسدے ہَن اِݙوں لب تے دُعائیں ہَن
رسُول اللہ ﷺ نے طیبہ دے وَل ہجرت چَا فرمائی
گلستانِ مدینہ پاک وِچ ہِک وَکھری بَہار آئی
لڳیاں چَنگا نَہ ہِک اَکّھ وِی اے مَکّے آلے کافراں کُوں
مُسلمان تِھی سَوکھے رَاہوِن نَہ ہئی منظور اے کافراں کُوں
اُو گِھن تے لَشکر وَݙا چَڑھ بھڄّے مَدینے تے
اِݙُوں کمزور ہا اسلام دَا لَشکر وِی مُقابلے تے
مقامِ بَدر تے ݙُوہاں پاسُوں لَڑائی تَھئی زور چا لایا
خُدا دی قُدرت نے آخر اِچ مُسلماناں کُوں جِتوایا
وَت بَدلا گِھنَّݨ کِیتے اِیں اَپݨی ہَزیمت دا
تیاری کر کے اڳلے سال کافراں دا لشکر وَلا آیا
ݙُوہَیں پاسُوں لڑائی تَھئی اُحد دِی جنگ اے تِھی گئی
رسُولِ پاک ﷺ ڄَیں ہستی وی اِیں جنگ اِچ تھی گئی زخمی
وَل آخر کافراں ٻِنّھاں قبِیلیاں کُوں وِی بَھڑکایا
تَھئی وَت خَندق دِی جنگ، غزوۂ احزاب پیش آیا
مُسلماناں کُوں فتح تھئی جا جا تے وَت اَللہُ اکبر
اِنُّوں مَکّہ وِی ہَتھ آیا، اُݙُّوں تِھی فتح ڳیا خیبر
عرب مسلماناں دے ہَتھ ہَا خُدا دا فضل ہَا سارا
نبی سئیں نے وَلا شاہانِ عَالَم کُوں وِی لَلکاریا
بھیج تے نامے مبارک ہر پَاسے ݙِتّی اِسلام دی دعوت
سَئیں دِی یَارہویں ہجری دے وِچ بِالآخر تِھی ڳئی رِحلت
نئیں آرام فرمیندے میݙے مَولا فقط مدینے وِچ
آکھ اِبن کلیمؔ اُو رَاہندِن ہَر ہِک مومِن دے سِینے وِچ
محمد ﷺ پاک دی رکھدا نِیں حُب دِل وِچ ڄِیڑھا مُسلم!
اُو سوہݨے دی شفاعت دا حَقدار بَݨ سَڳسِی بَھلا مُسلم؟
(اقتباس از کتاب: (سرائیکی منظوم) تَرِیخ نامہ (عہدِ رسالتﷺ تُوں مُظفّر خان شہیدؒ تَئیں)۔ مصنف، نظماں دا تخلیق کار (شاعر): ابنِ کلیم احسنؔ نظامی۔ تزئین و تکمیل: مبشر کلیم بن ابنِ کلیم احسن نظامی۔ تعاون: دبستان فروغِ خطاطی رجسٹرڈ ملتان۔ اشاعت: جولائی 2014 ء)
MubasherKaleem (talk) 16:43, 27 September 2018 (UTC)