سرائیکی دھرتی دِیاں ثقافتاں دا نِشابر نمونہ کلیم رقم

سئیں مخدوم محمد حسن خان کلیم رقم وݙے غریب پرور، سادہ دل اَتے حُب رکھݨ آلے شرافت دا پیکر اَتے خاص سرائیکی دھرتی دِیاں ثقافتاں دا نِشابر نمونہ ہَن۔ اُنہاں کُوں بلڈ پریشر راہندا ہَا 1970ء اِچ اَٹھ ݙینہہ نشتر ہسپتال ملتان اِچ علاج معالجے کیتے داخل رِیہے اللہ تعالیٰ نے شفا ݙے ݙتی۔ اِیں عارضے دے بعد اُنہاں کُوں ٻس ہک دُھن لگ ڳئی ڄو قرآن شریف دی مکمل کتابت کیتی ونڄے اَتے اِے سعادت مسجد نبوی اِچ گنبدِ خضریٰ دی چھاں تلے اے سوہݨی سعادت مل وَنڄے پر قسمت نے ساتھ نہ ݙتا اَتے عمر کُھٹی کھڑی ہئی۔ آخیر 1971ء اِچ آپݨے وݙے پُتر دی فوتگی دے ݙھائی مہینیاں ٻعد اَچݨ چیت ہِک رات حضرت خواجہ مفتی عبد الشکور سئیں دی امامت اِچ قدیمی مسجد میاں صاحب آلی خانقاہِ عبیدیہ کول ہِے۔ جماعت نال عشاہ دی نماز پڑھ کے گھر آئے تاں آپݨی عادت دے مطابق آخری واری سبھ نال پیار محبت، شفقت اَتے وݙی مہربانی نال اَلیندے رَہے۔ آپݨے بہنوئی قاضی شاکر محمد دیوانہ دے نال آخری ڳال اے کیتی ’’دِیوانہ صاحب رمضان شریف آندا پئے روغن زرد (دیسی گھیو) دیہات اِچوں گھن اَواہے، اے پیسے رکھو!۔ اَتے کلام اللہ پڑھدے پڑھدے سم ڳئے۔ رات دے پچھلے ویلے بلڈ پریشر دا حملہ تھیا دماغ دِیاں رڳاں پھٹ ڳیاں، انہاں دی اواز تے گھر آلے جاڳے تاں بیہوشی اِچ ݙٹھا۔ ڈاکٹر نور محمد لنگاہ کُوں سݙایا ڳیا اَتے ہمسائے حکیم عطاء اللہ سئیں دے پتر حکیم حنیف اللہ کوں وی سڈوایا ڳیا اُنہاں جواب ݙے ݙتا اَتے سِول ہسپتال گھن ونجݨ دا مشورہ ݙتا۔ اُتھاں ویندیاں تئیں ہِک گھنٹے بعد فوت تھی ڳئے۔ 22شعبان 1390ہجری مطابق جولائی 1971ء کوں علم اَتے فن دا اے بادشاہ ہزاراں شاگرداں تے حُب داراں کُوں روندا چھوڑ تے چلا ڳیا۔

سئیں کلیم رقم دے جنازے اِچ ہزاراں ٻندے ڄنہاں اِچ عالم، فاضل، فن دے ماہر، شاعراں، ادیباں، اَتے سجادہ نشیناں نے شمولیت کیتی۔ قانون داناں اَتے ہر فکر دے لوکاں نے نمازِ جنازہ پڑھی، حضرت خواجہ مفتی عبدالشکور سجادہ نشین دربار خواجہ محمد عبیداللہ نے نماز پڑھائی۔ غزالیٔ زماں سئیں سید احمد سعید شاہ صاحب کاظمی نے اِیں موقع تے اِنہاں لفظاں نال دُعا کیتی۔ ’’اللہ تعالیٰ حضرت مخدوم محمد حسن خان کلیم رقم کوں جنت الفردوس اِچ اعلیٰ عِلیین مقام ݙیوے تے ڄینویں اِنہاں دی ساری زندگی لفظاں کُوں سوہݨاں کر کے بݨائے اللہ اِنہاں دی آخرت وی ݙاݙھی سوہݨی کرے۔‘‘ آمین۔

ٻِیا ݙیکھو

• مخدوم محمد حسن خان کلیم رقم

• احسن التحریر ملتان دا دستکار۔

• لوک فنون دے ودھارے کِیتے احسن التحریر دے کاوِشاں    

• کلیم رقم دے ٻالاں دے لوک فنون کِیتے خدمات

• کلیم رقم دے لوک فن دی دُھم

• کلیم رقم دے فن دی لوک شاعری وِچ دُھم

• سیّد احمد سعید شاہ کاظمی اتے کلیم رقم

ٻاہرلے جوڑ

• سئیں ابنِ کلیم احسن نظامی دا اُردو وکیپیڈیا تے تعارف

• سئیں ابنِ کلیم احسن نظامی (مرحوم) دا ٻِیا پورھیا

• گُلِ رعنا ادب سوسائٹی دے ٻئے کتاباں۔۔