زبیدہ آغا

زبیدہ آغا (اردو: زبیدہ آغا) (انگریزی: Zubeida Agha) (ڄَمَّݨ دا سال: ١٩٢٢ء – فوت تِھیوݨ دی تَرِیخ: ٣١ اکتوبر ١٩٩٧ء) پاکستان نال تعلّق رکّھݨ آلی مہان٘دری مصورہ ہَن۔ اُوہ پاکستان وِچ تجریدی مصوری دی بانیاں وِچ ڳِݨڑی وین٘دی ہَن۔

حیاتی دا احوال

زبیدہ آغا ١٩٢٢ء وِچ لائل پور، (موجودہ فیصل آباد)، برطانوی ہند (موجودہ پاکستان) وِچ ڄَمّی ہئی۔ ١٩٤٤ء وِچ کنیئرڈ کالج لاہور توں تعلیم حاصل کرݨ دے بعد اُوں ویلے دے مہان٘درے مصوّر بی سی سانیال دے سٹوڈیو تُوں تصویر کشی دا اَغاز کِیتا۔ ١٩٤٦ء وِچ اِنّھاں کُوں شہرہ آفاق مصور پکاسو دے شَگِرد "ماریو پرلنگیری" توں مصوری سِکّھݨ دا موقع مِلیا۔ اِیں ورھے اُنّھاں نے لاہور وِچ ہِک ساجھی نمائش وِچ اپݨے چار فن پارے اَتے ݙو مجسمیاں دی نمائش کِیتی جِنّھاں نے وَݙّی دُھم پاتی۔

ہند دی ونڈ دے بعد اِنّھاں کُوں ٻاہرلے مُلخ سِکھلائی گِھنَّݨ اَتے فن پاریاں دی نمائش کرݨ دے وی اَݨ ڳِݨت موقعے مِلّے۔ ١٩٧١ء وِچ اِنّھاں کُوں راولپنڈی وِچ معاصر مصوری دی آرٹ گیلری اُسارݨ دا موقع مِلّیا۔ جین٘دی اُوہ ١٩٧٧ء تئیں ڈائریکٹر رہی ہَن۔ اِیں گیلری نال سنڳت دے وِچالے وِچ اُنّھاں دی اپݨی مصوری دی رفتار ٻہوں گَھٹ تِھی ڳئی اَتے اِنّھاں دی مصوری دی ٻہوں گَھٹ نمائشاں منعقد تِھی سڳیاں۔

اِنّھاں دے دُھم پاوݨ آلے فن پاریاں وِچ Evening، Blue Vase، Deserted Street، The Flood، Carnival and Red Flowers، Beethoven’s Fifth Symphony  اَتے Iceberg شامل ہِن۔

اعزازات

حکومتِ پاکستان نے زبیدہ آغا دی فن وِچ خدمتاں کُوں چِتوین٘دے ہوئے اُنّھاں کُوں ١٤ اگست، ١٩٦٥ء کُوں صدارتی تمغائے حسنِ کارکردگی ݙِتّا۔ پاکستان پوسٹ نے ١٤ اگست، ٢٠٠٦ء کُوں پاکستان دے مہان٘درے مصوراں اُتے مبنی ٤٠ روپے مالیت دی ڈاک ٹِکٹ شیٹ دا اِجراء کِیتا، اِنّھاں وِچ زبیدہ آغا وی شامل ہَن۔

وفات

زبیدہ آغا ٣١ اکتوبر، ١٩٩٧ء کُوں لاہور، پاکستان وِچ فوت تِھی ڳئی۔