اڄوکے دور دے لوک ادب دے لکھاری

اڄوکے عہد دی ہِک وڈی خوبی اے وی ہے جو ایں عہد کوں پڑھے لکھے تے سمجھدار لوک ادب دے لکھاری ملن۔ اے لوگ نہ صرف گالھ کرن دا ہُنر جانڑدن، بلکہ حالات دا تجزیہ کرن دی اہلیت وی رکھیندن۔ ہُݨ سرائیکی شاعر ، اپݨی سُنج بَر ، کوں خود ، وَساوݨ سانگھے ، میدان اِچ آ ڳئے ۔ او محنت تے خون پسینہ ہک کرکے، اپݨی دھرتی کوں آباد کرݨا چاہندے۔ اے او  دور ہے جئیں ویلھے سرائیکی شاعری کوں آپنا خون ڈیون سانگے، صابر چشتی جھئیں فقیر آپنا سب کجھ لُٹا  تے اِیں پِڑ تے آندن۔

اساںتاں اپݨے تھل کوںاپݨی

اَکھ دا پاݨی ݙیسوں

اپݨا آپ وسیسوں

نویں سرائیکی لوک نظم صرف محنت کرݨ دا حوصلہ اِی نئیں ݙتا بلکہ اے وی ݙسائے جو اِتھوں دے مسائل دا واحد حل تعلیم حاصل کرݨ اے ۔ اگر لوک تعلیم یافتہ تھی ڳئے تاں اوہ روہی ، تھل ، دامان وی سونے دیاں فصلاں ݙیسی ۔ پڑھے لکھے دانشور نے قوماں تے تہذیباں دا ویورا کیتے تاں ایں نتیجے تے پُجے جو اِتھوں دی وسوں دے مسائل دا پہلا حل، اِتھوں دے لوکیں دا تعلیم یافتہ ہوون ہے۔  تُساں ڈیکھسوں جو اِیں دور دی نظم کیویں کیوں اپنے مسائل دا ادراک وی کریندی پئی اے تے اُنہیں مسئلیں دا حل وی پیش کریندی پئی اے۔

ویڑھے ساݙے سوجھل تھیوے

ٻال ٻلوڑے پڑھ لکھ ونڄن

ڳالھ سِݨپ دی کرن جانن

کتھے لیکھ، لیاقت ماݨن

چمکن جیویں خالص تھیوے

کھاون میوے

نویں سرائیکی نظم آپنی گول دی تلاش اِچ ہے۔ اے آپنی ثقافت کوں لوکیں تئیں پُچیندی پئی ہے۔ اِیندے پچھوں اِتھوں دے لوکیں دا  احساسِ محرومی وی ہے۔ جے تئیں سرائیکی وسیب دے لوکیں نال نروار ورتیا ویسی، سرائیکی نظم نویں مزاحمت نال سامنے آندی راہسی۔  ایں سارے ویورے تو ں اے گالھ وی سامنے آندی اے جو کہیں وی خطے دی اُوہا تاریخ معتبر ہوسی، جیڑھی اُتھوں دی لوک دانش پیش کریسی۔ نویں سرائیکی نظم، دراصل اِتھوں دی تاریخ اے، جیکوں جتنا غور نال پڑھا ویسی، اُوندی گوجھی سامنے آسی۔ اتے جے تئیں او گوجھی سامنے نہ آسی، اِتھوں دے مسائل اِیویں اَن مُک تے اَن گُھٹ رہ ویسین۔ تے دھرتی جایا، آپنے ڈُکھ ایویں ای لکھدا رہ ویسی۔

ٻیا ݙیکھو

• ارشاد تونسوی دی لوک شاعری

• وسیب دا وݙّا لوک شاعر

• لوک شاعری اِچ وجودیت

• لوک شاعری وِچ استحصالی قوتاں دی فکر دا مطالعہ

ٻاہرلے جوڑ

• ڈاکٹر خالد اقبال صیب دی لائبریری دا ٻِیا مواد۔ ۔ ۔ ۔