گامݨ دا حال

سوھنڑی مہنیوال (جدید دور دی گالھ اے ٹکنالوجی دا دور اے)

رات دا پچھلا پہر اے جون جولائی چلدا پئے اچانک گڈا دے ھینگنڑ دی آواز نال سوھنڑی دی اکھ کھلدی اے اٹھی تے پانڑی پیندی اے کجھ پرے ابا کھٹڑے تے سمھ تے ٹک ٹاک چلا تے ڈھدا پئے اندھارے وچ موبائل دی لائٹ اچ ابے دا نورانی چہرہ چم چم کریندا پئے ھائے ووو ،،،اج تاں میں مہینوال کوں ملنڑ ونجڑاں ھا ،،سوھنڑی اپنڑیں آپ نال گالھ کریندی اے وت پریشانی اچ سر اچوں ڈو چار جواں کڈھ تے متھے تے ھتھ مار تے آپ کوں اھدی اے موبائل دا چارجر وی اج خراب تھیونڑاں ھا

اٹھی تے حقہ بکھا تے ڈو لمبے کش لیندی اے متھے دے وٹ ڈسیندے کھڑن جو سوچ وڈی گہری اے حقہ پی کراھیں ذھن فریش تھئے وت بھابھی کوں اٹھیندی اے

اڑی گامنڑ ،،،

او گامنڑ ،،، نندر اچ مست ھک موٹی رن اٹھی بیٹھی

کیہاں مرنڑاں ای،،سمھنڑ ای نوھے ڈیندے

اڑی گامنڑ اپنڑاں چارجر تاں ڈے

تیڈا بھرا چا گئے آکھے مل تے نوکری کریندیں ٹائم نی گزردا تے پب جی کھیڈساں ھنڑ او اگلے مہینے ولسی میڈے کول تاں نوکیا دا سیٹ اے

اچھا بھابھی،،اپنڑیں موبائل توں ھک کال تاں کروا چا سوھنڑی بھابھی دا منت ترلا کیتا

اڑی اللہ دی قسم بیلنس کائنی اے گھن توں آپ ڈیکھ چا،،،اے آکھنڑ دے بعد بھابھی ھک محفوظ جاہ توں موبائل کڈھیا نال ڈو ترائے سکے وی ڈھہہ پئے جیڑھے بھابھی ولا چا تے ٹکانڑیں لاتے اخیر ایڈوانس منگا تے اوں مہینوال دا نمبر ملایا

سلام دعا دے بعد مہینوال نراضگی دا اظہار کیتا ،،اج ملنڑ دا وعدہ ھا تیڈا تے میکوں مچھر پٹی چاتی ویندن سویر دا نہر دے نال آلے قبرستان اچ بیٹھاں ھنڑ تاں چلے کٹنڑ آلے وی چلے کٹ تے گھریں ڈو روانہ تھی گئین۔۔۔ جلدی آ ھنڑ تاں گولی دا اثر وی مکدا ویندے تیکوں پتہ اے جو میں نندر دا بھاڑی آں تے میں ھیں سانگے گولی کھادھی ھئی جو نندر نہ آوے

اچھا سئیں میں نوکر ۔۔۔ھنڑیں آندی پئی آں نال تیل وی چاتی آساں تے تیڈے سر دی مالش کریساں تیڈی نندر اڈ ویسے ھنڑ میڈا بیلنس مکدا پئے تے بند کریندی پئی آں

موبائل بند کر تے سوھنڑی بابھی ڈو ڈٹھا جیڑھی ولا وات کھول تے گھوک ستی پئی ھئی

بابھی ھنڑ ونجاں کیویں ،،پل آلے پاسوں تاں فرزانی ھوریں دے کتے ودے ھوندن اگلے جیہاڑے وی میڈی جنگھ چریندے ھن بھج تے جان چھڑائی ھم ڈیکھاں ڈٹھی جو ھاں میڈی سھنڑ ای پڑیج پئی اے

دریا کوں وی زور اے تے گھر کوئی ٹوپ ای کائنی لاتھی

اچھا توں اینویں کر ابے دی سلوار پا چا تے ستھنڑ پھوک تے پار تھی ونجیں ،،،بھابھی مشورہ ڈتا

اچھا بھابھی ٹھیک اے حقہ پیتم تے میکوں ڈو چار لاچیاں تے تیل دی شیشی تاں چا ڈے آتے اپنڑاں باڈی سپرے وی ڈے تھوڑا

اڑی خدا خدا کر عقل کوں ھتھ مار زمین اسمان کمب ویندے بھابھی کنیں کوں ھتھ لا تے آکھیا

کائناں کائناں چندری اینجھی کوئی گالھ کائنی مہینوال دے سر اچ تیل پیساں لحظہ کھن پیار دیاں گالھیں کریسوں تے ول واپسی

اچھا اچھا ٹھیک اے ٹائم نال ول آویں میں کئیں کئیں کوں جواب ڈیساں

ساری تیاری مکمل کر تے سوھنڑی کجھ دیر بعد چناب اچ تردی ویندی ھئی تے سچیندی ویندی ھئی جڈاں دا انڈیا ساڈا پانڑی بند کیتے ھنڑ دریا وی چھوٹا تھیندا ویندے میڈے پیر دریا دے تل کوں لگدے ودن ویسے ابے دی ستھنڑ دی کوئی ضرورت کائناں ھئی اے دریا تاں ٹر تے وی پار تھی ونجے ھا

اچانک سوھنڑی ھک مویا کتا ڈٹھا جیڑھا دریا دے پانڑی اچ تردا ودا ھا ڈڈھ اوندا اپھریج تے منجھ جیڈا تھیا ودا ھا تھوڑی ڈر تے سائیڈ تے تھیونڑ پئی گڑ گڑ دی آواز آئی تے پتہ لگا جو ابے دی سلوار ای پنچر اے تے دریا دے بارے اوندے سارے اندازے غلط ھن

ٹٹارے کھاونڑ کھڑ گئی کئی دفعہ تاں کتے دے منہ نال منہ ونج لگا پاروں منیہنوال چرس آلا سگریٹ لاتی بیٹھا ھا اوں ڈٹھا تے سمجھ گیا دریا اچ ٹپ کڈھ ماریس کتے کوں گھیل تے باھر کڈھ گیا منہ اچ منہ پا تے مصنوعی تنفس ڈینونڑ دی کوشش کیتس منہ تے نہوندراں لگیاں تاں پتہ لگا جو سوھنڑی کائنی،،

وت دریا ڈو دید پئی تاں اندھارے کوئی رن تھباکے مریندی تے مہینوال دی ما بھینڑ ھک کریندی ابھری۔۔

سور دا پتر آ ،،،پیوو کوں بعد اچ بھاکل پاویں پہلے میکوں کڈھ ،،ووئے تیڈا ککھ نہ رھے

مہینوال ولا ھک دفعہ ھمت ماری تے سوھنڑی کوں کڈھ تے کنارے تے آن سٹیس

آپ توں لچھے کھاندا ودیں تے اساکوں موت سڈ کھڑی مریندی اے سوھنڑی ساھکدی آواز اچ آکھیا

اتھاں تیڈا پیوو لچھے ویچنڑ آیا ھا ،،،

مریں تیکوں بچیندیں بچیندیں میڈے منہ اچ کہیں منجھ دی پھوسی آ گئی اے شئیت

سوھنڑی دے ھوش ولیئے تاں اوں سب توں پہلے ایہا شرط رکھی یا تاں فرزانی ھوریں دے کتیں کوں فجر دے ڈیہنہہ اچ زھر ڈے یا میکوں بھینڑ سڈ

اچھا نراض نہ تھی جیویں تیڈا حکم

آ تیکوں کباب کھواواں ،،

بھاہ دا مچ نال ھا ،،

اوے اے گوشت کتھو منگوائی اج تاں گوشت دا ناغہ نہ ھا

سئیں اے کل منگوایا ھم میڈا ھک یار لہور پڑھدے اتھاوں گھن آئے اھدا پیا ھا وڈا لذیذ گوشت اے

کباب پک تے تیار تھی گئے

پہلا لقہ مہینوال سوھنڑی دے منہ اچ پاتا

تے سوھنڑی دے منہ اچوں غلیظ مندیں دا طوفان جاری تھی گیا

نامرادا آ اے تاں حرام گوشت اے تے ھے وی کھوتے دا

تیکوں غلط فہمی تھئی اے

محبوب قصائی کنوں گھن آویں ھا تاں میں من وی گھناں ھا ،،

اے ڈیکھ گوشت تے اجاں وی سوٹیں دے نشان کھڑن،،،،

اج توں بعد تیڈی ساڈی ختم

میڈا بوزکی دا سوٹ تے ڈاہ ھزار واپس کر تے میکوں پار وی پجا وا،،

راقم الحروف لکھدے جو اوندے بعد واٹس اپ تے وی سوھنڑی مہینوال کوں بلاک کر ڈتا ،،ایں رات دی سویر وڈی عجیب ھئی سویرے سوھنڑی دے ابے دا اکلوتا کھوتا غیب ھا جیندی کھل تے پاوے مہینوال دے گھروں بر آمد تھئے

مہینوال ھیں ٹائم وی حرام گوشت ویچنڑ تے جانوریں تے ظلم کرنڑ دے کیس اچ اندر اے ایں کیس کوں تقویت تاں ملی جئیں ویلھے مہینوال دی جیب اچوں تیل دی بوتل دی برآمدگی تھئی شہر دا کوئی وکیل وی اوندا کیس لڑنڑ تے راضی کائنی

تحریر فیض بلوچ