ملک افضل گنجیال

ملک افضل گنجیال دا تعلق ضلع خوشاب دے شاہر گنجیال نال ہے- ملک افضل گنجیال یکم نومبر، ١٩٦٩ء وچ، گنجیال دے گِراں امیروالا وچ ڄمے ہَن- ملک افضل پاک فضائیہ توں چیف ٹیکنیشن ریٹائر تھئے ہَن- ولا نوکری توں ریٹائر تھیوݨ دے کجھ عرصے بعد، درس و تدریس نال وابستہ تھی ڳے- آپ نے ١٩٨٦ء توں شاعری شروع کیتی- عظیم سرائیکی شاعر، ملک آڈھا خان گنجیال دا کامیاب شاگرد ہووݨ دا اعزاز وی افضل گنجیال کُوں حاصل ہے- ملک افضل آپݨے استادِ محترم دا ٻہوں احترام کریندے ہَن ایں احترام اتے عقیدت دی وجہ کول افضل گنجیال، ملک آڈھا خان گنجیال کولوں ٻہوں فیض گِھدے-

کتاب

ملک افضل گنجیال حال مقیم سعودی عرب ہِن اتے ایں وقت Biomedical Engineering دے شعبے وچ آپݨے خدمات ݙیندے ودن- وقت دی کمی ہووݨ توں ملک صیہب دا بیشتر کلام کتابی شکل وچ موجود کائنی- ملک افضل گنجیال دا ہِک شعری مجموعہ اڄݨ تئیں شائع تھئے، جیندا ناں ہے "نماشاں"-

کلام

ملک افضل گنجیال دی سرائیکی شاعری وچ آپݨے سرائیکی وسیب نال محبت اور ضلع خوشاب دی پسماندگی اتے محرومیاں کُوں مکاوݨ دا جذبہ موجود ہے- اوں تو علاوہ افضل گنجیال دی شاعری وچ ہجر تے فراک وی پایا ویندے-

ݙوہڑا

خوشاب تے دریا سُوہیں روہیں، جیندا شاہد سارا جڳ اے، شان الڳ اے

نہراں، جھیلاں، چشمے، کھاݨا اس دھرتی دی شاہ رَڳ اے، شان الڳ اے

جیویں تھلویں پاسوں تھل تپدا اے، سِرٹھار سکیسر پَڳ اے، شان الڳ اے

سارا تل گنجیال ہے سونے دا تے سُوݨ عقیق دا نَڳ اے،

شان الڳ اے

ٻیا ݙوہڑا

جِتھے لیْکھ تے سڄݨاں ہتھ چِھکیا، ریہا پِھردا مُدت اُتھائیں ہاں

جیہڑی آہ فریاد نہ کیْں تائیں اَپڑی، کائی جیاں منسُوخ صدائیں ہاں

جیندی کھیتی پنچھی ٻئے لے ڳے، کائی جئے مقصُوم دا سائیں ہاں

ترُٹے ڄݙݨ دے ٻند گنجیال صبر دے، کِݙے سرت تے آپ کݙائیں ہاں

اصنافِ سخن اتے ڳاوݨ آلے سرائیکی فنکار

ملک افضل گنجیال اِنہاں اصنافِ سخن وچ شاعری کریندن:

• ݙوھڑا

• کافی

• ڳیت

• مثنوی

• نظم

• غزل

افضل صیہب دا کلام ٻہوں لوک فنکاراں ڳائے- مشہور سرائیکی ڳویاں وچ طالب حسین درد، اللہ دتہ لونے والا، اتے محمد حسین بندیالوی شامل ہن- ایندے توں علاوہ وزیر احمد طوطی، سلطان گُنجیالوی، شفیع وتہ خیلوی، گل تری خیلوی، عبدالرشید بھٹی، فرزند علی اتراء، احمد خان ملنگ اتے غلام عباس جاڑا وی ملک افضل گنجیال دا کلام ڳائے-