شاہد عالم شاہد
اصل ناں شاہد عالم
تخلص شاہدؔ
جمن 1973ء
تعلیم ایف اے
فون نمبر 03056959380
جاہ پتہ محراب والا (احمد پور شرقیہ)
سرائیکی ادب دے حوالے نال محراب والا اپنی ہک وکھری سنجان رکھدے،جتھاں سفیر لاشاری تے ظفر لاشاری جھئیں عظیم لکھاری پیدا تھئے،تے ول شاہد عالم خان شاہد وی اینہی قصبہ (محراب والا)دے جموڑ ہن۔شاعری دَینِ خدا وندی ہے تے ایہ صلاحیت اللہ تعالیٰ نے شاہدؔ صاحب کوں بدرجہ اُتم عطا فرمائی ہے۔سرائیکی غزل ہووے تے بھانویں نظم کمال درجے دی شاعری کریندن۔ڈاڈھیاں دا ڈڈھپ ،وسائل توں محرومی، بکھ تس ،بے وسی تے روہی دا منظر نامہ اپنے ہک مخصوص انداز نال بیان کریندن۔
غزل
لکھواے کیندی ہستی ہے، اوندی ہستی کوں گول ڈیکھے
جے گولناں ہے تاں اپناں اندر پھرول ڈیکھے
اساں تاں تھی ونجنے داناں داناں بہوں نماناں
کوئی تاں ساکوں ملوک ہتھیں مکول ڈیکھے
اے چندر وی کوئی عجیب کھڈکار بن گیا ہے
جڈاں وی ڈیکھے او گھن کے بدلیںدی اول ڈیکھے
نچن تے آوے تاں دل نماناں عجیب ناچا
نہ پڑ سنبھالے نہ تھاپ پرکھے نہ دول ڈیکھے
مسیت دے نال نال مندر اساڈے اندر
اساڈے اندر کوں کوئی کیا آتے تول ڈیکھے
اساں تاں ہیں ٹھیڑھ اساڈے اندر قہر دے قصے
کوئی تاں آتے اساڈے اندر کوں چول ڈیکھے
جے قربتاں دیاں چساں کوں شاہدؔ او نئیں سمجھدا
ستاریں دے نال چاندنی دے مخول ڈیکھے
غزل
لکھوکیا سندیں توں سسی ، پنوں ،ہیر سیال دے قصے
آسوں پاسوں کھنڈیئے پئے ہن مونجھ ملال دے قصے
کل وی دردیں وات رعایا ،اج وی اندھا راجا
بالکل ماضی وانگوں لگدن ساکوں حال دے قصے
کیا شہزادیاں کیا پریاںکیا دیہہ کیا محل منارے
بکھے بالیں کوں تاں بھاندن روٹی دال دے قصے
مدتیں توں ہن اکھیں توں رخساریں تونیں ہنجوں
مدتیں کولوں سندیں آندوں استحصال دے قصے
ساڈی ساری عمراں گزری سفریں دے وچ شاہدؔ
ساڈے کولوں کیا پچھدے وے در درسال دے قصے