سیدہ نفیسہ

سیّدہ نُفَیسَہ (اردو: سیدہ نفیسہ) (ڄَمَّݨ دی تَرِیخ: ٩ جون ٧٦٢ء – جھوک لݙ ون٘ڄݨ دی تَرِیخ: جنوری ٨٢٤ء) اہل بیت دی ہِک مہان٘دری عالمہ ہَن۔

کائرو دی نفیسہ مَسِیت

ابتدائی حالات

سیدہ نفیسہ چہار شنبہ دے ݙیہاڑے ١١ ربیع الاوّل ١٤٥ ہجری مطابق ٩ جون ٧٦٢ء کُوں مکہ مکرمہ وِچ ڄَمّی ہَن۔ سیدہ نفیسہ دے پِیؤ حسن بن زید بن حسن ابن علی ہَن۔ سیدہ نفیسہ دا نکاح پندرھاں ورھیاں دی عمر وِچ ١٦٠ھ مطابق ٧٧٧ء وِچ اُنّھاں دے چاچے دے پُتر اسحاق مؤتمن بن جعفر الصادق نال تِھیا۔ سیدہ نفیسہ مدینہ منورہ وِچ اپݨے پِیؤ دے نال رہن٘دی ہَن۔ سیدہ نفیسہ اَتے اسحاق موتمن نے ݙو ٻال قسم اَتے اُمِ کلثوم یادگار چھوڑے۔

مصر کن کُوچ کرݨ

٢٦ رمضان ١٩٣ھ مطابق ١٢ جولائی ٨٠٩ء وِچ سیدہ نفیسہ نے مصر کَن کوچ کِیتا جاں جو اُنّھاں دی عمر اُوں ویلے ٤٨ ورھیاں تُوں وَدھ تِھی چُکّی ہئی۔ مصر وِچ عوام نے اُنّھاں دا استقبال کِیتا۔ مصر وِچ سیدہ نفیسہ نے اپݨے پئے دے نال ہِک تاجر جمال الدین بن عبد اللہ بن جَصّاص دے مکان وِچ ٹِکاݨاں کِیتا۔ کُجھ مہینیاں دے بعد اُمِ ہانی دے مکان وِچ چلے ڳئے اَتے اُون٘دے بعد ابو السرایا ایوب بن صابر دے مکان وِچ ٹِکاݨاں کِیتونیں۔ عوامی جَتّھیاں دے پارُوں آپ کُوں مَلُوم تِھین٘دا ہئی جو شئیت اِیہ جَتّھے ٹَٻَّر آلیاں کِیتے ݙُکھ دا سوب بݨدے پئے ہِن، اِیں پارُوں مصر چھوڑݨاں چاہن٘دے ہَن جاں جو لوکاں نے حاکمِ مصر تُوں ارداس کِیتی جو اُوہ سیدہ نفیسہ کِیتے ٹِکاݨے دا انتظام کر ݙیوے۔ حاکم مصر نے ہِک مکان سیدہ نفیسہ کِیتے مخصوص کر ݙِتّا اَتے اِیں طرحاں آپ مصر وِچ ہمیشاں کِیتے ٹِک پئے۔

وفات

ماہِ رمضان ٢٠٨ھ مطابق جنوری ٨٢٤ء وِچ سیدہ نفیسہ بِمار تِھی ڳئے اَتے اِین٘دے باوجود روزے نال رہے۔ رمضان دے کہِیں ہِک شبِ جُمعہ وِچ طبیعت وَدھ خراب تھئی اَتے بھان٘ویں جو اُوں ویلے تلاوتِ قُرآن مجید وِچ مشغول ہَن، جِہڑیلے سورۃ الانعام دی آیت: "لَهُمْ دَارُ السَّلاَمِ عِندَ رَبِّهِمْ وَهُوَ وَلِيُّهُمْ بِمَا كَانُواْ يَعْمَلُونَ (١٢٧)" اُتے پُڄّے تاں نبض ٻُݙّݨ لڳّی اَتے اِیں حالت وِچ جھوک لݙ ڳئے۔ جھوک لݙ ون٘ڄݨ ویلے اِنّھاں دی عُمر ٦٣ ورھیاں ٦ مہینیاں دی قمری ورھیاں دے مطابق ہئی۔

تدفین

سیدہ نفیسہ دی بِماری دے ویلے اُنّھاں دے پئے مدینہ منورہ وِچ ہَن، جِہڑیلے اُنّھاں کُوں خبر مِلّی تاں اُوہ مصر کِیتے ٹُر پئے جاں جو جِہڑیلے اُوہ مصر اَپڑے تاں سیدہ نفیسہ جھوک لݙ ڳئے ہَن اَتے لوک اُنّھاں دی تدفین دی تیّاریاں کرین٘دے پئے ہَن۔

معاصرین

امام شافعی

امام شافعی سیدہ نفیسہ دے ویلے دے ہَن۔ ٢٠٠ ہجری مطابق ٨١٦ء وِچ امام شافعی مصر آئے اَتے سیدہ نفیسہ نال سماع حدیث دی تحصیل کرین٘دے رِیہے۔ جِہڑیلے اُوہ مسجد فسطاط وِچ تدریس کِیتے وین٘دے ہَن تاں اثنائے راہ وِچ سیدہ نفیسہ دے گھر وِچ توقّف کرین٘دے ہَن اتے اُنّھاں دی اخذ حدیث کرین٘دے ہَن۔

امام احمد بن حنبل

• امام احمد بن حنبل سیدہ نفیسہ دی علمی اَتے اخذ حدیث دی ٻیٹھکاں وِچ شرکت کرین٘دے ہون٘دے ہَن۔

ٻِیا ݙیکھو

• حسن ابن علی