سلیم بن قیس ہلالی

شیخ ابوصادق قیس کوفی دے پُتر تے امام علی ، امام حسن تے امام حسین امام زین العابدین علیہم السلام دے صحابی ہئے ۔ جوانی وچ حضرت عمر دی حکومت دے وخت اچ مدینہ منورہ اچ داخل ہوین ۔ نبی اکرم صلی اللہ علیہ وآلہ وسلم دے صحابیاں تے انصار نال مکمل تعارف دے بعد حضرت علی علیہ السلام نال ہو گئے وُن ۔ اناں دا حضرت سلمان ، ابوذر تے مقداد نال بوت زیادہ دوستانہ ہئیا ۔ سلیم بن قیس پیغمبر اکرم صلی اللہ علیہ وآلہ وسلم دی وفات سی بعد اُناں دی سیرتِ طیبہ دے بارے وچ لوکاں کولو پُچھ دے رہین ۔ تے نکے نکے مسئلے بی یاد کر لیندے ہئے ۔ حضرت عمر تے عثمان دے زمانے وچ حدیث تے پابندی ہوݨے دے باوجود آپڑیاں حدیثاں چھُپائے رکھ دے ہئے ۔ امام علی علیہ السلام دے زمانے وچ اناں نوں حقائق لکھݨیں دا وخت ملا اے ۔ حضرت سلیم جنگ جمل ، صفین تے نہروان وچ بی امام علی علیہ السلام دے نال ہئے ۔تے امام حسن تے امام حسین علیہا السلام دے زمانے وچ بی اناں نے اناں نال ای رہے وُن ۔ کربلا دے واقعے دوران اے قید اچ ہئے ۔ امام حسین علیہ السلام دی شہادت دے بعد بی اناں نے امام زین العابدین علیہ السلام دے نال ہئے ۔ سنہ ۷۵ ھ وچ حجاج بن یوسف دے ظلم تے ستم سی تنگ آکے ایران ول ہجرت کیتی نے ۔ تے فارس دے ہک ” نوبندجان ” ناں دے شہر وچ رہݨیں لگے ین ۔اس شہر وچ اناں دی ابان بن ابی عباس ناں ولے ہک نڈے نال اناں دا سلام دٰعا ہوئے تے ہک دوسرے نال جان پچھاݨ ہوئی اے ۔ دینی مسئلے سیکھݨیں دا اناں نوں بوت شوق ہئیا جس دی وجہ نال اناں نے آپڑی زندگی دے آخری دناں وچ امام علی علیہ السلام تے اُناں دے پُتراں تے ودے صحابیاں دے فرماناں نوں ہک کتاب دی شکل وچ لکھا نے ۔سنہ ۷۶ ھ وچ سلیم بن قیس دی وفات سی بعد ابان مدینہ گیا اے تے امام زین العابدین علیہ السلام دی خدمت وچ حاضر ہویا تے سلیم بن قیس ہلالی دی لکھی اوی کتاب اناں دی خدمت وچ پیش کیتی نے ۔ امام دے دوصحابیاں کہ جناں دے ناں ابوطفیل کنانی تے عمرابی سلمہ ہئے ، نے ترے دناں وچ اے کتاب پڑھ کے امام علیہ السلام نوں سُݨاِئی اے ۔ تا امام سجاد علیہ السلام نے فرمایا اللہ انوں بخشے اُنے بالکل سچ کیا وے ۔ اے سارا ساڈا ای کلام اے کہ جنوں اسی جاݨ نے آں ۔ امام علیہ السلام نے اس کتا ب نوں شیعاں دی طرفو پیلی لکھی گئی کتاب دے طور تے تائید کیتی اے ۔ کہ جیڑی بعد اچ ” کتاب سلیم بن قیس ” دے نال مشہور ہئی اے ۔ تے علما دی تو جہ آپڑے ول موڈ لیتی وُس ۔ سلیم بن قیس نوں ہک معتبر شیعہ لکھاری دی حیثیت حاصل اے ۔ اناں دی کتاب دے بار وچ علماء دا نظریہ اے وے کہ اتنے زمانےاس کتاب تے لگݨیں دے باوجود اے کتاب تحریف سی محفوظ تے امُن وچ اے ۔ ابان بن ابی عیاش ، ابراہیم بن عمر یمانی سلیم بن قیس دے شاگرداں چو وُن ۔+