سرائیکی وکیپیڈیا

2008ء وچ وکیمیڈیا انکوبیٹر تےسرائیکی زبان وچ وکیپیڈیا دا منصوبہ شروع تھیا جیہڑا 22 نومبر 2020ء کوں منظور کر ݙتا ڳیا تے 15 دسمبر 2020ء کوں ایندی اپݨی ویب سائٹ لانچ کر ݙتی ڳئی۔ ایں طرح 22 نومبر ݙو ہزار ویہہ سرائیکی زبان و قومیت کیتے ہک تاریخی ݙینہہ بݨ ڳیا۔

سرائیکی بھُوم ڳوجھی (انسائیکلوپیڈیا) دی حتمی منظوری تے باقاعدہ آغاز

سرائیکی وکیپیڈیا دا آغاز وکیمیڈیا انکوبیٹر تے ٢٠٠٨ء وچ تھیا ہائی۔ اوں ویلے نیٹ دیاں سہولیات گھٹ ہووݨ پاروں سرائیکی دا کم مٹھی چال نال چلدا ریہا۔ ٢٢ نومبر ٢٠٢٠ ء کوں باقائدہ منظوری تھئی تے انجینئراں ویب سائٹ بݨاوݨ شروع کر ݙتی۔ سرائیکی وکیپیڈیا دی ویب سائٹ ١٥ دسمبر ٢٠٢٠ء کوں آن لائن تھئی۔ اے ویب سائٹ منگل ٢٩ ربیع الثانی ١٤٤٢ ہجری تے 3 پوہ 2077ء بکرمی کوں شام کوں یعنی ٻدھ رات شروع تھیوݨ ویلے رات کوں ساݙھے اٹھ وڄے سرائیکی وکشنری دے نال مکمل تھئی۔

سرائیکی زبان دی علمی ترقی وچ وکیپیڈیا دی اہمیت تے ضرورت

سرائیکی زبان دے حروف تے الفاظ سرائیکی دی سُن٘ڄاݨ ہن، علم کہیں وی قوم کیتے ضروری شئے ہے، او کتاب جیندے وچ سارے علوم ہوون اوں کوں انسائیکلوپیڈیا اہدن، اڄکل کمپیوٹر تے موبائل دا دور ہے، کتاباں نیٹ تے آ ڳیاں ہن،، ساݙی زبان سرائیکی ایں معاملے وچ ذری پچھوں ہے،، سرائیکی زبان وچ تے سرائیکی لکھائی وچ آن لائن سرائیکی وکی پیڈیا موجود ہے، دوستو سرائیکی کی بورڈ انسٹال کر گھنو تے سرائیکی وکیپیڈیا وچ آپݨی پسند دے مطابق آپݨے آپݨے فیلڈ مثلاً اسلامیات، سائنس، کیمسٹری، انجینئرنگ، ثقافت، ادب تے سیاست بارے مضمون لکھݨ شروع کرو،

دوستو! ایہ کم پنجابی وکیپیڈیا وچ شروع تھی ڳیا ہے، پنجابی وچ ستر ہزار مضمون ہن، اردو وچ ݙو لکھ مضمون ہن، جے تہاکوں سرائیکی نال پیار ہے تاں سرائیکی وکیپیڈیا دی خدمت ضرور کرو۔

وکی پیڈیا تے کم کرݨ دا طریقہ

سرائیکی وکی پیڈیا تے کم کرݨ ٻہوں سوکھا ہے۔

سرائیکی بھُوم ڳوجھی (انسائیکلوپیڈیا) وچ شامل علمی شاخاں تے کم دا طریقہ کار

وکی پیڈیا دا کھاتہ بݨا تے لاگ ان تھی ون٘ڄو۔ لاگ ان تھیوݨ دے بعد تساں کوئی نواں مضمون وی لکھ سڳدے ہو تے پہلے آلے مضموناں وچ تبدیلی وی کر سڳدے ہو۔

نواں کھاتہ بݨاوݨ

نواں کھاتہ بݨاوݨ کیتے اتھ کلک کرو ہک ورقہ کھلسی۔ آپݨاں ورتݨ ناں لکھو، ݙو واری پاس ورڈ لکھو وت ہک کیپچا لکھیا ہویا ہے ہوں کیپچا دے ہیٹھاں کیپچا آلے حروف لکھو، وت کھاتہ "آپݨاں کھاتہ کھولو" تے کلک کرو۔ کھاتہ بݨ ویسی۔

لاگ ان تھیوݨ کیتے اتھ کلک کرو لاگ ان تھی وکی پیڈیا وچ لکھݨ شروع کرو۔

• وکی پیڈیا ورقے وچ گھٹ وگھٹ ہک لنک ضرور بݨاؤ۔ لنک بݨاوݨ کیتے ݙو وݙیاں بریکٹاں لاؤ۔ مثال دے طور تے سرائیکی زبان دا لنک بݨاوݨ کیتے سرائیکی زبان دے ٻاہروں ݙو وݙیاں بریکٹاں لڳسن۔ [[سرائیکی زبان ]]
• سرخی بݨاوݨ کیتے سرخی آلی عبارت دے ݙوہاں پاسوں ݙو ݙو برابر دے نشان لڳسن۔ مثال دے طور تے ==سرخی ==
• سرائیکی وکی پیڈیا تے آرٹیکل لکھݨ دا مرحلہ وار طریقہ
• وکی پیڈیا تے کم کرݨ دی انگریزی وڈیو
• دید آلی ایڈیٹنگ

• یاد رکھو جو وکی پیڈیا وچ لکھݨ دے ݙو طریقے ہن. ہک ماخذ وچ لکھݨ تے ݙوجھا دید آلی ایڈیٹنگ ہے.
• ایہ وی یاد رکھو، جو کمپیوٹر تے ویب سائٹ وچ لکھݨ دا طریقہ وکھرا ہے تے موبائل سائٹ تے لکھݨ دا طریقہ وکھرا ہے.
• ٻیا ایہ وی یاد رکھو، جو ہر روقے دے تلے تلے لکھا ہوسی موبائل سائٹ یا ڈیسک ٹاپ، تساں اتھ کلک کرتے سائٹ دا منظر وٹا سڳدے ہو. مطلب ایہ جو موبائل تے وی ڈیسک ٹاپ سائٹ کھول تے کم کر سڳدے ہو. تے ڈیسک ٹاپ تے کم سوکھا ہوندے.