سرائیکی لوک نظم اساں مُسلم ہیں

سئیں ابن کلیم احسن نظامی شاعر ادیب و صحافی دی سرائیکی وسیب دے رشوت دے مسئلے کُوں بیان کرین٘دی ہوئی ہِک سرائیکی لوک نظم: ۔

اَساں مسلم ہیں'اساں مسلم ہیں

ساݙے دِل وِچ چانݨ وسیا اِے

قرآن نے ساکُوں ݙسیا اِے

ڄیڑھا سبق ݙتا ہا پاک نبیؐ

محبّت تے اخوّت دا

قرآن دے وِچ وِی حکم تھِیا

ہِک ٻئے دے نال مُروّت دا

دین دِی رسِّی پکڑ گھِنو!

اسلام نے ساکُوں ݙسیا اِے

اَساں مسلم ہیں'اَساں مسلم ہیں

ساݙے دِل وِچ چانݨ وسیا اے

قُرآن تے آکھے کٹھے تھِوو

جِیوو دِین دی خاطر جِیوو

فِرقہ بازی وِچ نہ پھَسّو

ہِک ٻئے کُولوں وَکھ نہ تھِوو

اتحاد،ایمان یقین محکم

قائد نے ساکوں ݙسیا اے

اساں مسلم ہیں،اساں مسلم ہیں

ساݙے دِل وِچ چانݨ وسیا اِے

کُجھ مولوی تاں اے آکھدے ہِن

فرقے بازیاں چلݨ ݙیوو

سیاست کار وی آکھدا ہِے

نفرت ے بھانبڑ بلݨ ݙیوو

یہُود ہنُود نے رَل مِل کے

اَڄ دِین اَساں تُوں کھسیا اِے

اَساں مُسلم ہیں اَساں مُسلم ہیں

ساݙے دِل وِچ چانݨ وسیا اِے

اَڄ ذاتی مفاداں دی خاطر

نفرت دِیاں بَھائیں ٻلدیاں ہِن

ہِک ٻئے دے مَار مُکاوݨ کُوں

کلا شنکوفاں چَلدیاں ہِن

ساݙے عمل کُڄّڄے ݙیکھ کے سب

کن پکڑ شیطان وِی نسیا اِے

اَساں مسلم ہیں اَساں مسلم ہیں

قرآن نے ساکُوں ݙسیا اِے،

ساݙے دِل وِچ چانݨ وسیا اِے؟

تبصرہ

اے ہِک سوالیہ نظم ہِے ڄیندے وِچ پُچھیا ڳے ڄو اَساں سچی مُچی مُسلمان ہیں؟اَتے کیا اساݙے کم وِی مسلماناں آلے ہِن؟ نظم دے پہلے بَندہ ءِچ اے آکھیا ڳے ڄو اللہ اَتے اُوندے رسول (صلی اللہ علیہ وآلہٖ وسلم) دا حکم ہِے ڄو ہک مُٹھ تھِی تے راہوو۔ ݙوجھے بند ءِچ بانئی پاکستان حضرت قائد اعظم محمد علی جناحّ دے مشہُور اَتے مقبولِ عام مرمودات "ایمان،اتحاد اَتے یقین محکم" کُوں شعر ءِچ ڈھالیا ڳِے ڄیڑھے ڄو ءِچ وی فوج ءِچ تاں مقبول ہِن پر لڳدے ڄینویں باقی قوم قائد دا اے فرمان بھُل چکی اِے اِیں نظم دے تریجھے بند ءِچ اِتھوں دے روایتی مولوی اَتے سیاستدان دے اَڄ دے کردار کُوں ظاہر کیتا ڳے، ڄیندا نتیجہ اے ہے ڄو اَڄ پوری قوم دے اڳّوں بد امنی تے تخریب کاری دا جِن پیا نچدے ڄیکوں ساری محِبّ وطن خوف زدہ تھی تے ݙیدھے پین۔ اَتے لب تے اے دُعا ہنّے ڄو شالا اے سوپݨی دھرتی تے اِیندے واسی خوش پئے وَسِّن۔ سئیں ابنِ کلیم نے طنزیہ انداز ءِچ اے مزاحمتی نظم یا ݙوجھے لفظاں ءِچ مسلمانیت دا نغمہ لِکھّے ڄیکوں پڑھ تے سمجھݨ آلیاں کُوں ءِی سبق حاصِل تھِسی۔  ۔

ٻِیا ݙیکھو

• ابن کلیم۔

• ہٻڑاس پوتھی۔

• سئیں ڈاکٹر مہر عبدالحق تے ابن کلیم

• رشوت لوک نظم۔

• ہِک ہِک تھِی تے ملک بچاؤ لوک نظم

ٻاہرلے جوڑ

• سئیں ابنِ کلیم احسن نظامی دا اُردو وکیپیڈیا تے تعارف

• ہٻڑاس (پوتھی) آن لائن پڑھݨ کِیتے۔

• گُلِ رعنا ادب سوسائٹی دے ٻئے کتاباں

• سئیں ابنِ کلیم احسن نظامی (مرحوم) دا ٻِیا پورھیا