سرائیکی قصہ

سرائیکی قصے افسانوی ادب دی ٻہوں پراݨی صنف ہے۔ادب وچ نثری قصیاں دی او قسم جیندی بنیاد زیادہ تر خیال آرائی تے ہون٘دی ہے، تے کردار عموماً مثالی ہون٘دے ہن تے زبان وچ تکلف وی گھٹ ہون٘دے۔
قصہ او مکمل صنف ہے جہڑا مختلف زمانے دے لوکاں دے حالات زندگی تے واقعات بارے معلومات فراہم کریندے تے نسل در نسل، سینہ بہ سینہ منتقل تھیندے۔ قصہ عربی زبان دا لفظ ہے جیندا مطلب ہے پچھوں ٹُرݨ۔ اردو وچ کہاݨی تے انگریزی وچ(Tell) کنوں ٹیل ہے۔ ایندے وچ زمانی تے مکانی قید کائنی ہون٘دی۔
قصہ یا بیانیہ صحیح معنی وچ کئی واقعات دی ہک داستان ہوندی ہے، جہڑے ہک ٻئے دے بعد ترتیب نال بیان تھیندے ہن۔ قصہ سُݨݨ تے سݨاوݨ دی روایت منڈھ قدیم کنوں آن٘دی پئی ہے تے ایہ سرائیکی وسیب دی پراݨی روایت ہے۔