سرائیکی ثقافت

ثقافت کہیں وسبے دے لوکیں دے جیوݨ جوڳ ، ورت ورتاء، کھاڄ ہنڈھیپ تے خوشی غمی دے نیٹے دا سانجھا اظہار ہوندے۔ ثقافت کہیں وسبے دے لوکیں دا سانجھا ورثہ ہوندے۔

سرائیکی ثقافت تل وطنی لوکیں دے ہزاریں سالھیں دے وسب کنوں پھپھڑی ہے۔ سرائیکی ثقافت دیاں پاڑاں اتھوں دی مٹی، دریاویں، بیٹ ٻیلیں، تھل چترانگ، تے روہی راوے وچ ہن۔

ہزاراں ورہیاں پہلے سرائیکی وسوں تے دھرتی ماء دی پوجا تھیندی ہائی۔ دھرتی کوں ماء سمجھا ویندا ہا، اڄ وی احتراماً مسیت کوں مائی مسیت آکھیا ویندے۔ ایہ ہے سرائیکی ثقافت ۔۔۔

سندھ وادی دی تہذیب دا جݙاں عروج ہا تاں داݨے پھکے دے سانجھے بھنڈار ہوندے ہن جتھوں لوک اپݨی لوڑ موجب ان داݨا چا ویندے ہن تے پینہہ پکا کھمدے ہن ۔۔۔ ایہ ہے سرائیکی ثقافت ۔۔۔

ہزاراں سال بعد ڄݙاں سندھ وادی دے دھرتی وچ دفن شہریں دی پٹ پھرول کیتی ڳئی تاں اتھوں محنت پورہیئے دے اوزار لدھن ۔ تلواراں یا انسانی بربادی دے ہتھیار نئیں ملئے ۔۔۔ ایہ ہے سرائیکی ثقافت ۔۔۔

اجتماعیت تے سانجھ دی سبھ توں وݙی نشابری سرائیکی جھمر ہے جیندے وچ ہکے پڑ وچ ستر سال دا ٻڈھڑا تے ست سال دا ٻال رل تے جھمر پیندن ۔۔۔ ایہ ہے سرائیکی ثقافت ۔۔۔

سرائیکی قومی تحریک وی دراصل ثقافتی تحریک ہے ۔۔۔ سرائیکی تحریک دی اثر پذیری ایں توں ودھ کیا ہوسے جو سرائیکی دھرتی تے آوݨ والے مختلف رنگ نسل تے جغرافیے دے لوک تھوڑے عرصے بعد ایں دھرتی دے رنگ ءوچ رنگیج ڳئے تے انہاں ایں دھرتی دی زبان تے ثقافت کوں اپنا گھدا ۔۔۔ چھی مارچ دا ݙینہہ سرائیکی وسوں دی ثقافت دیاں ریتاں نال ڳانڈھے دا تقاضہ کریندے۔

اکھیاں اڑسن دلڑیاں ٻکسن ، دھرتی دی تاثیر تے

سرائیکی ثقافت دیاں نشانیاںلکھو

سرائیکی زبان، سرائیکی دے خاص حروف تے صوتاں،  سرائیکی ݙوہڑا،. جھمَر، سرائیکی لوک گیت، اجرک،. پٹکا،. کھسہ، لاچا، پنڈ،. انب،. کپاہ،   لکڑ دا کم،. ملتان دے اُٹھ دی کھل دے لیمپ، ملتانی سوہن حلوہ، ݙولی روٹی، ݙالے دا بھت، سیرا، ثوبت، سوہان٘جݨاں، کچنال، سرائیکی دربار، سیاحتی تے تاریخی مقامات  سرائیکی ثقافت دی نشانیاں ہن۔