سجاد حیدر رحمانی

سجادحیدررحمانی وی ٹُر گئے یار! 1990دے ڈہاکے دے منڈھ اچ ضلع رحیم یارخاں خاصکرخان پوروچوں سرائیکی تحریک جیویں ابھری میڈے جھئیں کئی نوجوان ایں کن متاثرتھئیں بنا نہ رہ سگیے، اے اودورہئی جڈانہہ خان پوردی سنگت سرائیکی تحریک دا سبھ توں وڈا کٹھ کیتا ہئی جیندی ہوک ہندسندھ تئیں پُنی تے بانبڑو ٹردی سرائیکی تحریک پیریں ٹرپئی، ایندی ہک وڈی گواہی جگ مشہورفوک گلوکارعطااللہ عیسیٰ خیلوی ڈھیرواری آپڑیں انٹرویواچ ڈے چکے جواوندی حیاتی دا سبھ توں وڈا عوامی پروگرام خان پوراچ تھیا ہئی، جیہڑا اصل اچ سرائیکی تحریک دا کٹھ ہئی۔۔۔۔۔۔۔۔۔۔۔۔۔۔۔۔۔
جے تئیں یاد پوندے اوں ویلھے خان پوراچ بزرگ رہنما سئیں رازجتوئی،استاداعجاز، منیرخاں جتوئی، بابوعبدالمجیدکانجوسئیں دے علاوہ مجاہدجتوئی، طارق جتوئی، سانول بھٹی، ایم ایم نعیم، سئیں منیردھریجہ، سئیں ظہوردھریجہ، راشدعزیزبھٹہ، پیرایاز،مظہرسعیدگوپانگ، میاں سجن تے سئیں سجادحیدررحمانی بہوں زیادہ متحرک ہن۔ سجادحیدررحمانی نال میڈی پہلی ملاقات اچانک تھئی، 1991دی گالھ ہوسی میں ایف ایس سی کریندا پیا ہمی تے ڈگری کالج راجن پوردے ہاسٹل وچ رہندا ہمی، ہک ڈینہہ دھمی ویلھے کمرے دا دروازہ زورزورنال کھڑکیا اکھیں ملیندا اٹھی کے کھولیم تاں پیاراسنگتی نازک مڑل کھڑاہئی، اوں ڈسایاجوسرائیکی شاگردسانجھ دے کجھ دوست اوندے کمرے اچ موجوداِن جیہڑے ساجھرے نال خان پوروں آئن (اساں وی آپڑیں کالج دی حدتئیں سرائیکی شاگردسانجھ اچ کافی متحرک ہاسے)، خیرمونہہ تے چھٹا مارکے نازک دے کمرے اِچ گیُم تاں اتھاں چارسنگتی (طارق جتوئی، سانول بھٹی تے ڈوبئے موجودہن جہاں دے ناں یادکائنی)انہاں دا حال حوال چاتا، انہاں ڈسایاجوجیے سندھ تحریک دا قافلہ آندا پئے تے کوٹلہ نصیرچوک تے انہاں کوں آدُرڈیونے، اساں تاں اینجھے کمیں سانگے ہرویلھے تیارہوندے ہاسے، خیرتڑکرکے کپڑے وٹاکے کالج دی کنٹین تے مہمانیں کونریان کروایا، ول کالج داچکروی لوایا، جے تئں ضیااللہ سیال (صدرسرائیکی شاگردسانجھ ڈگری کالج راجن پور)تے کجھ بئے سنگتی وی پُج گئے تے ول قافلہ بنڑاکے کوٹلہ نصیرچوک پُج گیوسے جتھاں ڈوچارمقامی رہنماواں دے علاوہ خان پورتوں رتے رنگ دی کاراچ ایم ایم نعیم سئیں، میاں سجن، ہک سنگتی دا ناں یادکائنی تے سجادحیدررحمانی سئیں وی پُج چکیے ہن، اساں کافی دیرتئیں جیے سندھ تحریک دے دوستیں دی تانگھ کیتی پراو ناں آئے (اوموبائل فون یا فیس بک دا زمانہ نہ ہئی، ہفتہ مہینہ پہلوں ڈس ڈتا ویندا ہئی جواساں فلانے ڈینہ فلانے ٹیم فلانی جاہ تے آئوسوں پُج ونجاہے)، خیرڈوپہراں ویلھے انہاں دی تانگھ لہاکے اساں ویہہ پنجوی دی سنگت ہوٹل تے ونج بٹھوسے تے چاہ دے بہانے آپڑیں کچاری لاڈتی، (میں اوں ویلھے تئیں سرائیکی شاگردسانجھ اچ متحرک ضرورہمی پر کئی اینجھے سوال وی بھیجے اچ پُڈدے ہن جنہاں دے جواب میڈے کول کائنا ہن، مثال طورہک اے سوال ہئی جو سرائیکی صوبہ پاکستان تروڑن دی سازش اے، اساں سبھے مسلمان اوں تے ول سرائیکی دی گالھ کیوں کریندوں، بھٹوپاکستان تروڑیا ہئی تے ہنڑوی پیپلزپارٹی بقیہ پاکستان کوں تروڑن سانگے سرائیکی تحریک چلوائی کھڑی اے وغیرہ وغیرہ) (میں اے سوال کامریڈمنظوربھوہڑ، عاشق بزدار تے صوفی تاج گوپانگ سئیں کن پچھنڑ توں احتراماً ڈردا ہمی)پر کوٹلے نصیردے پڑاِچ خان پورتوں آئے سرائیکی اگواناں سامڑیں بے دھڑک سارے سول رکھ ڈتے (اوں ویلھے خبرپئی جو اے سوال صرف میڈے نہ ہن بھلکہ سرائیکی شاگردسانجھ اچ متحرک بئے سنگتیں دے وی ،ہن پراو وی میڈی کار مپ ماری ودے ہن)۔۔۔۔۔۔میڈے تکھے سوال سنڑکے سجی سنگت سجادحیدررحمانی سئیں دو ڈٹھاتے آکھیا رحمانی صیب تساں انہاں سوالاں دے جواب ڈیوو۔۔۔۔۔۔۔۔۔۔۔۔۔۔۔
رحمانی صیب آپڑیں مٹھے تے ٹھڈے نمانڑیں لہجے وچ ادھ گھنٹہ لاکے جیویں انہاں سوالاں دے جواب ڈتے اومنظرمیکوں اج تئیں نئیں بھلدا تے ول کڈاہیں کہیں سوال تے میکوں مشکل پیش نہ آئی، اوں محفل اچ اندرداسوجھلا ملیاجو اصل گالھ بئی اے، سلیبس اچ ساکوں ساراکوڑپڑھایاویندے، ملاں وی کوڑمریندے تے گھر/وستی اچ وی سرکار دی تے ملاں دی گالھ کوں اگوں تے ٹوریا ویندے۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اوں ڈینہہ دے بعد سجادحیدرحمانی صیب چھپن چھپادی ٹوپی پاگھدی تے ول انہاں نال کڈاہیں ملاقات دامیل نہ بنڑیا، کئی ڈوسال پہلے د گالھ اے دیرہ غازیخاں دے سنگتی فیروزملک فون کیتاجو اسلام آباد آئے ودوں تے پریس کلب آندے پیوں جے ٹیم ہووے تاں، میں آکھا سئیں بندہ حاضراے، آپڑیں مترصفدرکلاسرا تے غضنفرعباس کوں وی ڈسایم تے پریس کلب پُج گیوسے،سنگت نال تعارف تھیون لگاتاں انہاں آکھیامیڈاناں سجادحیدررحمانی اے تے خانپور رہنداں۔۔ ۔۔۔۔۔۔۔۔۔۔۔۔۔۔۔۔۔۔۔ مغز اچ سٹ لگی تاں میں آکھیا تساں اوہے سجادحیدررحمانی او۔۔۔۔۔۔۔۔۔۔۔۔انہاں آکھیاجی سئیں۔۔۔۔۔۔۔۔۔۔ول بھاکل پتوسے تے حال حوال رلیوسے۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔اوندے بعد وی رحمانی صیب ڈوواری اسلام آباد آئے تاں ناچیزکوں ملاقات دا موقع ڈتونے ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔پرکل اچانک بزرگ رہنما مشتاق فریدی سئیں فیس بک تے بدخبری ڈتی جوسجادحیدررحمانی رضا تھی گئے۔۔۔۔۔۔۔۔۔۔۔۔۔۔۔۔۔۔۔۔۔اج میں رحمانی صیب دے فون تے کال ملائی تاں انہاں دا وڈاپترعبداللہ روندا بیٹھا ہئی اوں روندیں آکھیا جی آ، ابارضا تھی گئے، میں اونکوں پرچا نہ سگیم ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔سال پہلوں اینویں ای استاد اعجازبلوچ فیس بک تے بدخبرڈتی ہئی جو ’’میڈا بہوں پیارا وسیم واگھا چپ چپاتا ایں دنیاتوں ٹرگئے‘‘ آخرایں فیس بک دا کیا کریجے جیہڑی ساکوں خیردی خبرگھٹ اے تے بدخبریاں زیادہ ڈیندی اے!!