زرینہ بلوچ

زرینہ بلوچ (اردو: زرینہ بلوچ) مہان٘دری ڳائیکہ، اُستانی، ترجمہ کار، اداکارہ اَتے سیاسی پورھیے دے حوالے نال وݙّا ناں ہِے۔ سندھ دے شہر حیدر آباد وِچ ڄَمّے ہَن۔ اُنّھاں دے وِیہ ورھیاں تئیں سندھ یونیورسٹی دے ماڈل سکول وِچ پڑھایا۔ ١٩٦٤ء وِچ عوامی تحریک دے اڳواݨ رسول بخش پلیجو نال شادی کِیتی۔ ضیاء دور وِچ بُھٹّو بچاؤ تحریک وِچ اُنّھاں نے ݙو سال قید کَٹّی۔ ون یونٹ دے خلاف پورھیے وِچ وَدھ چڑھ تے حِصّہ گِھدّا۔ کُجھ ورھیاں پہلاں جݙݨ کالا باغ ڈیم دے خلاف سندھ دے لوکاں نے بِھٹ شاہ تُوں کراچی تئیں لانگ مارچ کِیتا تاں اُنّھاں نے اِین٘دے وِچ حِصّہ گِھدّا۔ اِیں وِچالے وِچ پُلس نے ݙو واری اُنّھاں اُتّے لَٹھ چارج کِیتا۔ اُنّھاں نے اَنجو انج سیاسی جَتّھیاں دے احتجاجاں وِچ حِصّہ گِھدّا۔

ڳائیکی اَتے اداکاری

زرینہ بلوچ نے شیخ ایاز، اُستاد بخاری اَتے تنویر عباسی کُوں ٻہوں ڳایا۔ بلوچی ڳاݨے، گُل خان نصیر دی شاعری، اردو وِچ فیض احمد فیض، احمد فراز اَتے کُجھ سرائیکی گِیتاں کُوں ڳایا۔

اِنّھاں دے ترے درجن کنُوں وَدھ آڈیو کیسٹاں ریلیز تِھی چُکّیاں ہِن۔ میونخ فیسٹیول وِچ اِنّھاں دی اداکاری اُتے مشتمل ناٹک " دنگي منجھ دريا" دُنیا بھر وِچ تِرِیجھے لمبر تے آیا۔ اُنّھاں نے اردو وِچ انا، جنگل، کارواں اَتے سندھی وِچ راݨی دی کہاݨی جئیں دُھم پاوݨ آلے ناٹک کِیتے۔

پیپلز پارٹی دے دورِ حکومت وِچ اُنّھاں کُوں پرائیڈ آف پرفارمنس ݙِتّا ڳیا۔ اِین٘دے توں انج اُنّھاں نے پی ٹی وی ایوارڈ، شاہ لطیف ایوارڈ، سچل سر مست ایوارڈ، شہباز اَتے کئی ٻئے اِنامات گِھدّے۔

گِیت

اُنّھاں نے قومی گِیت ڳا تے سندھ دی تحریکاں وِچ جوش پیدا کِیتا۔

کتاب

اُنّھاں نے ہِک پوتھی " تنهنجي ڳولها، تنهنجيون ڳالهيون" (تُہاݙی ڳویڑ، تُہاݙے ڳالھِیں) لِکّھی۔ ترے تُوں وَدھ ناٹک لِکّھے۔

وفات

زرینہ بلوچ دا انتقال ٢٥ اکتوبر ٢٠٠٥ء کُوں کراچی، پاکستان وِچ تِھیا۔