ذہنی غُلامی

لکھت :ارشد لاشاری

وطن عزیز ءچ جتھاں ڈھڳ ساریاں عجئبات،معجزات،تے،تخلیقات گھڑیاں ڳن او اپݨی جاھ پر جو. حشر نشر تاریخ نال کیتا ڳے او دنیاں دے ادب اور روایت ءچ ھک منفرد اسلوب ھے ،

اے دنیاں دا واحد ملخ ھے جتھاں فخر نال اپݨی نسلاں کو پڑھایا ویندے جو تیݙا پیو ݙاݙا ،چوھڑا،مڑیچا ھا ݙرو تے کافر ھا، انسان آکھاؤݨ دے قابل وی نہ ھا، تے ولا کئی غزنی، ترکستان یا سمندر پارو عظیم مہاندرا آیا اوں تیݙے پیو ݙاݙے کوں قتل کیتا تیݙی ماء بھیݨیں کو شرعی کنیز باندیاں بڑایا ،تیݙی دھرتی کو رڄ لٹیا، تیݙے انجنیرنگ دے شہکار شھاریں کو ساڑ تے سواہ کر چھوڑیا، اور تیݙے بچی کھچی نسل ایں ایمان افروز سلوک تو کامل ایمان دا قبول کر تے انسان بݨن دا شرف حاصل کیتا،

وݙے تکبر نال مقامی تل واسیاں کو ہم نسل لوکیں کوں مسلئی،چوھڑا،پولی بھیل،تے کمی کمین آکھیا ویندے ،

اتھ فخر نال آکھیا ویندے اساکوں تے اساݙی دھرتی کو ترک لٹیے،افغانی لٹیے ،یونانی لٹیے عرب لٹیے تے ایرانی لٹیے ،

اتھ فخر نال آکھیا ویندے اساݙے دھرتی ڄاے پورس ،ݙاھر ،ساہتی ،ملھ، لنگاہ،تے روہیلے ،دھرتی کوں بچاوݨ دی گستاخی کریندے کتے دی موت مریے، انھیں صرف اپݨی دھرتی تے پورھیا بچاوݨ دی خاطر عظیم ایماندار سپاہ سلاریں کو ست بسم اللہ کرݨ دی بجاے انھیں نال لڑن دی کافرانہ تے ناپاک جسارت کیتی،

زہنی غلامی دا اے عالم ھے جو ھر چور لٹیرے دی باقیات. غزنی غوری مغل سید ترک ایرانی ازبک،تے درانی وغیرہ کوں اساں اڄ وی عقیدت دی نظر نال ݙیہدے ھیں. انھیں دے ناویں تے شھار تے تعمیرات بݨیدے ھیں تےاپݨی نسل کوں آدھے ھیں اساں انھاں لوکیں دے کمی کمین ھیں ،اے وݙے عظیم لوک ھن،

بھاویں جو انھاں عظیم لوکیں کنے کئی فلسفہ، ادب، آرٹ،آرکیٹکچر، زرخیز دھرتی، ہنر، یا تہزیب کینھا ھا، پر ول وی اے دنیا دے عظیم لوک ھن جنھیں دا زریعہ معاش صرف تلوار ھا اور قتل و خشحال دھرتی کو لٹݨ ھی انھاں دا کم ھا،،

ارمان تے اے ھے جو اڄ وی ستر سال کنے ودھ عرصہ گزرݨ دے کوئی ھک بندا وی دھرتی ڄایا نی ملیا جیندے ناں تے کوئی شھار یا تعلیمی ادارہ ھی بݨ سکے،،،،،

کیوں،

کیونکہ زہنی غلامی سرایئو کر تے اساݙے dna وچ شامل تھی چکی ھے، اڄ اساں جیکر آدھے ھیں کہ پورس، ݙاھر، تے ملھ اساݙے عظیم دھرتی ڄاے ھن، تے 100% ہم نسل لوک ھی اساݙی زہنی کیفیت تے شک کریسن، جیکر اساں کجھ زیادہ شور کیتو سے تے یقیناً اساݙا ایمان وی مشکوک تھی ویسی،

آخر ءچ جانباز صہیب دا ھک مصرہ ھے

تدبیر بݨاوݨ. والا تدبیر سوچیندا رہیا

یا مولا میکوں شاھی ݙتی قانون رکھیسا ٻیا