دیہاتی بندہ تے شہر

دیھاتی بندا پہلی دفعہ شہر گیا نال ذال تے نکا پُتر ھاسی پھردیں ٹُردیں وڈے شاپنگ مال ءچ ونج پہنچا ،نکے پُتر ڈیٹھا لفٹ اتے تلے تھیندی کھڑی ھے اوں ابے کنیں سوال کیتا ،ابا اے کیرھی شئے ھے ابے بھلا اے بلا کڈاں ڈیٹھی ھئ سیدھا جواب ڈتس یار میکوں نیں پتہ اے کیرھی شئے ھے ، اجاں الویندے کھڑے ہن ہک بڈھڑی ویل چیئر تے بیٹھی ھوئ آئ اوں لفٹ دا نمبر ماریا دیوراں چیرجنڑ لگ گیاں وچو ہک چھوٹا جھئیاں کوٹھا نظر آیا بڈھی اندرو، دروازہ بند، نمبر چالو ،ہک ،ڈُو،ترائے ،چار ،پنج،چھ ،ست،پیؤ پُتر حیران پریشان ڈیھدے کھڑے ہن وت نمبر چالو تھی پئے دراوزہ کھلیے وچو ہک لال متیری انگریز قسم دی چھوکری نکھتی ،دیھاتی پُتر کوں آکھیا اچھا اے چکر ھے میکوں ساری گال سمجھ آ گئ ونج کُڈ ونج ماء کوں پکڑ آ ایں کوٹھے ءچ پیلھا.

کجھ اساں وی ایں چکر ءچ کُڈ کے نویں بندے لفٹ ءچ وڑا کھڑے ہیں ہُنڑ کھڑے ہیں وات پٹی متاں لال متیرے نکلدے ھوون کائینا میڈا مکھنڑ جئیندے نصیب ءچ ٹیٹک ھوون او لال متیرے نئیں کھاندے،تھاکوں لال متیریں دا لالچ ڈے کے یا خواب ڈکھا کے ( بُڑَنمبے ) ڈتے گئین نکے ویلھے اساں جڈاں چِدے کھیڈدے ھاسے اُڈھایں ہک اکھانڑ ھوندا ھا ساکوں ادھارے پیسے ڈیو تھاکوں چبڑھیں دی بار تے ولا ڈیسوں،ہُنڑ وی اساں چبڑھیں دی بار تے ونج سدھروں تاں ھے پہلے کوئ امکان نیں نظردا ، وڈے گودے مر گئین جنھیں کوں ساڈا ڈاڈا تے ابا ووٹ ڈیندے ہن ہُنڑ انھیں دی نویں نسل کوں اساں ووٹ ڈیندے ھیں اجاں ساڈے بالیں انھیں دی بی نسل کوں ووٹ ڈیونڑے آخر (اُرسی کُرسی کندھ ایرے تے ٹُرسی،)نکے ویلھے دی اُو کھیڈ یاد ھیوے گول گول گُھمدے ھاسے تے آھدے ہاسے آلیاں بوالیاں ،دائ دے کنیں والیاں ،بس اوھے آلیاں بوالیاں کھاندے کھڑے ہیں تے کھاندے راہسوں، تلکِنڑ تاں منڈھو یاد ھوسائے سارا ڈینھ تلکدے ھوئیں چس آندی ھئ پَر رات کوں سیدھے سم ناسے سگدے اے اوھا تلکنڑ ھے بابو چساں چاتے نے ہُنڑ سیدھا سمنڑ تاں پریں دی گال ھے پاسے تے سمنڑ جوگا چھوڑن میکوں گلاء ڈیوائے ،،،جمیل بلوچ.