خوف دی نفسیات (کہاݨی)
خوف دی نفسیات تے منطق ہِک اہڄی لوک کہاݨی / لوک قصّہ ہِے جیڑھا اساݙے سرائیکی وسیب دے لوک ادب وِچ ٻہوں مہان٘درا زبانی قصّہ ہِے۔
ݙریا بھَوکلھے بندے دا مسٔلہ نہیں اوندے اجتماعی لاشعور دا مسٔلہ ہے۔ کئی واری تاں خوف دے پِچھو کوئی معقول وجہ اِی نہیں ہوندی۔ ٻس بندہ بلاوجہ کہیں خوف دا شکار تھی ویندے یا وت خوف دے پِچھو وجہ کئی ٻئی ہوندے تے اوندا اظہار کہیں ٻئے طریقے نال تھیندا پیا ہوندے۔ میں خود ہک دفعہ استاد فدا حسین خان گاݙی نال اے ڳالھ کیتی جو میں پمیشہ ایں خوف دا شکار رہنداں جو کتھائٰں میݙی نوکری ختم نہ تھی ونڄے۔ اُنہیں اپݨے مخصوص انداز اِچ آکھیا،بندے دا ٻچہ جے اے خوف نہ ہوسی تاں کوئی ٻیا خوف ہوسی،ایندا مطلب اے ہے جو بندہ ہر وقت کہیں نہ کہیں خوف اِچ مبتلا رہندے۔ بھانویں اوں خوف دی سمجھ آوے بھانویں نہ آوے۔ ڳالھ اے ہے جو آکر اے خوف ہے کیا؟ ایں ٢٠وی صدی اِچ جیڑھلے بندہ اتنا مضبوط ہے او اَڄ وی اونویں خوف دا شکار ہے جیویں اوندی صدیاں پہلے دے وݙ وݙرے۔ ایندے پِچھوں شاید اے وجہ ہے جو ابتداء اِچ جہدِبقادی جیڑھی کوشش وچ بندہ مبتلا رہ ڳئے جبلت وچ اَڄ وی اونکوں نہیں کڈھا ونڄ سڳدا۔ اَڄ وی اوندا او ݙر کہیں نہ کہیں شکل وچ اوندے اندر موجود ہے۔ اُوں بندے بس ݙو کم ہَن یا خوراک کٹھی کرݨ تے یا باقی درندے کینوں اپݨے آپ کوں بچاوݨ،جیندے وچ اوندے ہم جنس وی شامل ہن۔ اَڄ بندہ جیڑھے ویلھے انہیں ݙوحالتیں وچوں کہیں دے وچ مبتلا تھیندے تاں اوندے وچوں اوندا او پُراݨا ݙاݙ نکل آںدے جیکوں صرف ہک ڳالھ دا پتہ ہا جو میݙے زندہ رہݨ دی ہک اِی صورت ہے ج؛ے میں ݙوجھی صورت حال کوں ختم کر ݙیواں۔ اوں ویلھے اوندی ساری سفاکی ،ساری خود غرضی،تہذیب دے اعلیٰ آدرش بھُلا کے اپݨے پراݨے ݙاݙے دی جبلت اونکوں آخری سچائی دے طور تے قبول کر گھنیندی ہے۔ دنیا دے تمام قوانین،تمام اعلیٰ ادرش تمام اَسمانی صحیفے خوف دی ایں نفسیات دے خلاف کوئی یقین فراہم نہیں کرسڳے۔ اَڄ وی طاقت دے خلاف دلیل تے منطق اتنی ای کمزور ہے جتنی غار دے آدمی کیتے اپݨے طاقتور ہم جنس کنوں ݙوگر انہہ اپݨی بکُھ مِٹاوݨ دے خاطر حاصل کرݨ۔