حضرت عثمان بن عفان رضی اللہ عنہ

حضرت عثمان بن عفان اموی قریشی (47 ق ھ - 35 ھ / 576ء - 656ء) اسلام دے تریجھے خلیفہ راشد، داماد رسول تے جامع قرآن ہن۔ عثمان غنی سابقین اسلام وچ شامل ہن تے عشرہ مبشرہ وچوں ہک ہن۔ انہاں دی کنیت ذو النورین ہے کیونکہ انھاں نے حضرت محمد صلی اللہ علیہ وسلم دیاں ݙو صاحبزادیاں نال یکے بعد دیگرے نکاح کیتا ہئی، پہلے رقیہ بنت حضرت محمد نال تے ول انہاں دی وفات دے بعد ام کلثوم بنت حضرت محمد نال نکاح کیتا۔ عثمان غنی پہلے صحابی ہن جنھاں نے سرزمین حبشہ دی ہجرت کیتی، بعد وچ دیگر صحابہ وی آپ دے پچھوں حبشہ پہنچے۔ بعد ازاں ݙوجھی ہجرت مدینہ منورہ دی جانب کیتی۔ رسول اکرم صلی اللہ علیہ وسلم، حضرت عثمان غنی تے مکمل اعتماد تے انہاں دی فطری حیاء و شرافت تے جو کجھ انھاں نے اپݨے مال دے ذریعے اہل ایمان دی نصرت کیتی ہئی، انہاں دی انتہائی قدر کریندے ہن۔ رسول اللہ صلی اللہ علیہ وسلم نے دیگر صحابہ دے نال انہاں کوں وی جنت تے شہادت دی موت دی خوش خبری ݙتی۔

دور خلافت

سنہ 23 ھ (644ء) وچ خلیفہ عمر بن خطاب دی شہادت دے بعد مشورے نال آپ کوں خلافت دی ذمہ داری سونپی ڳئی، جینکوں انھاں نے 644ء توں 656ء تک انجام ݙتا۔ انہاں دے عہد خلافت وچ جمع قرآن مکمل تھیا، مسجد حرام تے مسجد نبوی دی توسیع تھئی تے قفقاز، خراسان، کرمان، سیستان، افریقیہ تے قبرص فتح تھی کے سلطنت اسلامی وچ شامل تھئے۔ نیز انھاں نے اسلامی ممالک دے ساحلاں کوں بیزنطینیاں دے حملوں توں محفوظ رکھݨ کیتے اولین مسلم بحری فوج وی بݨائی۔