حضرت ادریس علیہ السلام

قرآن مجید دے ݙو سورتاں وچ آپؑ دا ذکر آیا ہے۔ سورۃ مریم "سورہ مریم" آیت 55 وچ خدا نے آپؑ کوں سچا نبی آکھا ہے۔ سورہ الانبیا آیت 86.85 وچ اسماعیلؑ اور ذوالکفل علیہ السلام دے نال آپؑ کوں وی صبر والا تے نیک بخت آکھا گیا ہے۔ بائبل دے مطابق آپؑ دا ناں ضوک ہئی تے آپؑ یارد دے پتر ہن۔ آپؑ نے 365 برس دی عمر پاتی تے ول مع جسم خاکی آسمان تے چا گھدے گئے۔ حضرت ادریسؑ دی شخصیت، زمانے تے وطن دے بارے وچ مورخین وچ اختلاف ہے۔

حیات طیبہ

حضرت ادریسؑ اللہ دے عظیم نبی ہن. آپؑ ہک اعلٰی درجے دے منتظم ہن جنہاں نے سب توں پہلے ٹاؤن پلاننگ شروع کیتی تے شہراں کوں منظم انداز نال آباد کیتا. آپؑ ٹاؤن پلاننگ دے بانیاں وچ شمار تھیندن. ہک روایت دے مطابق آپؑ زندہ حالت وچ جنت بھیڄے ڳن.

آپؑ حضرت شیثؑ دے پتر انوش دی نسل وچوں ہن۔ آپؑ دے والد دا ناں یارد تے والدہ دا ناں برکانہ ہئی۔ آپؑ دی بیوی دا ناں عادنہ ہئی۔ آپؑ دا ہک پتر وی ہئی جس دا ناں متوشالخ ہئی۔ ادریسؑ، حضرت نوحؑؑ دے پڑݙاݙا وی ہن.

آپ دا نسب اے ہے :-

” " ادریس (حنوک) بن یارد بن مہلل ایل بن قینان بن انوس بن شیث(ع) بن آدم(علیہ السلام).

آپؑ دی وفات توں کجھ دیر پہلے اللہ نے آپؑ کوں فرمایا کہ ہݨ توں تساں جتنی دیر زندہ رہسو، دنیا وچ جتنے انسان وی کوئی نیکی کریسن انہاں دا ادھا ثواب تہاکوں ملسی، اس تے آپؑ بے حد خوش تھئے۔ اتنے وچ ہک فرشتے نے آپؑ کوں آ کے خبر ݙتی کہ عزرائیلؑ آپؑ دی روح قبض کرݨ آندے پن جس تے آپؑ حیران تھی گئے تے اس فرشتے دے پراں تے ٻیہہ کے اللہ نال ملݨ ٹر پئے، آپؑ نے پہلا، ݙوجھا تے تریجھا آسمان پار کر گھدا تے جس وقت چوتھے آسمان تے پہنچے تاں اتھاں آپؑ کوں عزرائیلؑ ملے، آپ نے اللہ توں ٻئی زندگی منگی جس تے اللہ نے نہ کیتی ول آپ اتنی زندگی تے ہی راضی تھی گئے تے ول عزرائیل نے آپ توں روح قبض کرݨ دی اجازت گھدی، ادریس(علیہ السلام) نے عزرائیل کوں اجازت نہ ݙیندے ہوئے اللہ توں دعا کیتی کہ آپؑ دی روح عزرائیل دی بجائے اللہ خود قبض کرے ول اللہ نے خود ادریسؑ دی روح قبض کیتی تےآپؑ دی خواہش پوری کیتی۔ آپؑ نے 365 سال دی عمر پاتی۔

قرآن وچ ذکر

قرآن مجید وچ آپؑ دا ذکر ݙو مرتبہ آیا ہے۔ پہلا ذکر سورہ الانبیاء آیت 85 تے ݙوجھا سورہ مریم آیت 56-57 وچ آیا ہے۔

وَإِسْمَاعِيلَ وَإِدْرِيسَ وَذَا الْكِفْلِ كُلٌّ مِّنَ الصَّابِرِينَ۝ (سورہ الانبیاء آیت 85)

”اسماعیلؑ تے ادریسؑ تے ذوالکفلؑ کوں، اے سبھے صبر کرݨ والے ہن۔“

وَاذْكُرْ فِي الْكِتَابِ إِدْرِيسَ إِنَّهُ كَانَ صِدِّيقًا نَّبِيًّا. ۝ وَرَفَعْنَاهُ مَكَانًا عَلِيًّا. ۝(آیت56،57، سورہ مریم)

”تے کتاب وچ ادریسؑ دا ذکر کر، بے شک او سچا نبی ہئی۔تے اساں اونکوں بلند مرتبے تے پہنچایا."