حضرت ابراہیم علیہ السلام

آپؑ ابوالانبیاء دے ناں نال مشہور ہن. نبی آخرالزمانؐ آپؑ دی اولاد وچوں ہن جیندے تے آپؑ فخر کریندے ہن. آپؑ نے موجودہ خانہ کعبہ دی تعمیر فرمائی. جیندے وچ آپؑ دے فرزند حضرت اسماعیلؑ وی آپؑ دے نال شریک تھئے. اسلام توں علاوہ یہودیت تے عیسائیت دا شمار وی ابراہیمی مذاہب وچ تھیندے.

ابراہیمؑ

ولادت با سعادت

آپؑ دی ولادت اڄ توں چار ہزار سال پہلے عراق دے علاقے بابل وچ تھئی جتھاں نمرود حکمران ہئی. آپؑ دے پیو دا ناں آذر ہئی جیہڑا نہ صرف بت پرست ہئی بلکہ بت گر وی ہئی یعنی مٹی تے پتھر دے بت تراش کے وچیندا ہئی تے ایہو اوندا کاروبار ہئی. آذر نمرود دے دربار وچ ہک اہم مقام رکھدا ہئی تے اوندے ٻہوں قریب ہئی. آپؑ دی ولادت توں کجھ عرصہ پہلے کاہناں نے ربوبیت دا دعوٰی کرݨ والے نمرود کوں ݙس ݙتا ہئی کہ اوندی بادشاہی تے حکمرانی کوں ختم کرݨ والا پیدا تھیوݨ والا اے. ول باوجود پابندیاں دے اللہ دے حکم نال آپؑ دی ولادت تھی ڳئی.

سیرت تے ذاتی حالاتِ حیاتِ طیّبہ

ابراہیم علیہ السلام او پہلے پیغمبر ہن جنہاں کوں اللہ نے مُسلمان آکھ کے پُکارا۔ مُسلمان اُنہاںؑ کوں خلیل اللہ (اللہ کا دوست) آکھدے ہن۔ ابراہیمؑ دی نسل توں کئی پیغمبر پیدا تھئے، جنہاں دا تذکرہ عہدنامہ قدیم وچ ہے۔ اسلام دی کتاب قرآن مجید وچ وی ٻہوں سارے اینجھے انبیاء دا ذکر ہے جیہڑے ابراہیمؑ دی نسل وچوں ہن ۔ اسلام دے آخری نبی مُحمد صلی اللہ علیہ و آلہ وسلم وی ابراہیمؑ دی نسل دے وچوں ہن.

اللہ دے نشانیاں تے تفکّر تے انہاں دا بطور رسول اللہ انتخاب

آپؑ بچپن توں ای اکثر آسمان تے نظر کر چندر، ستارے تے ݙوجھے اجرام فلکی تے غور تے تفکر کریندے ہن. آپؑ سوچیندے ہن کہ اتنی وݙی کائنات دا کوئی نہ کوئی خالق ضرور اے جیندی تلاش ضروری اے تے ایں مسلسل تفکر، توحیدی نظریے تے اللہ دی جستجو دی وجہ توں اللہ نے بطور رسول تے نبی آپؑ دا انتخاب فرمایا.