تمن

سو سواریں دے دستے یا سواریں دے جتھے کوں تمن آھدن ۔ ایندے لفظی معنی ڈاہ ہزار دے ہن ۔ڈاہ ہزار دے جتھے کوں تمن آھدن جیندے کنوں ڈاہ ہزار اسلحے والے بندیں دا جتھا ہووے ہا او تمندار سڈویندا ہا ۔انگریزیں آپڑیں حکومت کوں تکڑ ڈیونڑ سانگے انگریز سرکار نال وفاداری دے بدلے تمندار مقرر کیتے اتے ہنیں کوں مراعات ڈتیاں۔ پنجاب دے وستیاں تے موضعے رلا تے ہک ذیل بنڑا ڈتی ویندی ہئی ۔ایں حلقے وچ نمبر دار مقرر کیتے ویندے ہن نمبر دار دے اتے ہک سفید پوش تے سفید پوش دے اتے ہک ذیل دار مقرر کیتا ویندا ہا جیڑھا جو انتظامی نگرانی ، مالیے دی وصولی ، افسران محال تے پولیس دے افسریں دے آرام و آسائش دا خیال رکھیندا ہا۔ تہوں اوندی دھج ہوندی ہئی۔

نمبر دار کوں مالیے دی وصولی تے پنجوترہ (پنجواں حصہ) جڈاں جو ذیل دار تے سفید پوش کوں ششماہی فصل دے فصل تنخواہ ملدی ہئی ۔ڈیرہ غازیخان ، بہاول پور یعنی سرائیکی وسیب تے سندھ دے علاقئیں اچ تمنداریاں قائم کیتیاں گیاں۔ سرائیکی وسیب اچ نئوں تمنداریاں ہن ۔ ہنڑ صرف نمبرداریاں باقی ہن۔ ہک مچھی دا ناں وی تمن ہے جیکوں سمدراد وی آکھیا ویندے اے مچھی چھوٹے مچھیں کوں کھا ویندی ہے ۔ تمندار وی ایویں کریندے ہن تے ہنڑ انہاں دی نسل وی ایہو کجھ کریندی پئی ہے۔