تاریخ. دا ہک قانون

"تاریخ دا اے قانون وی بٻہوں چسولا ہے جو ہک ویلھے دی بتھی ریت کوں مکاوݨ کیتے ہک نویں ریت وٹاپھیر،تبدیلی اتیں انقلاب دا پرچار کریندی ہے. وت جیرھلے سماج کوں ہک مزید نویں ریت دی لوڑھ پوندی ہے تاں اوہا تبدیلی پرچارݨ والی ریت اڳلے وٹا پھیر دے خلاف فتوے ڈیوݨ شروع کر ݙیندی ہے. اتھ ݙو لفظیں دے لسانی ورتارےEpistemology دی مثال ݙیوݨ چنڳالڳسی.

اسلام صحرائے عرب دے اتیں پوری دنیا دے پراݨے مذہبیں اتیں رواجیں (قیصروکسری) کوں ہلاوݨ اتیں وٹاوݨ دا نغارہ وڄ کیں آیا. . . ڈھیر مد نہ گزری جو بدعت (بدع، تجدید ، نواں پن) دی مناہی کرݨ مفتیاں اتیں قاضیاں دا نت دا ہتھیار بݨ ڳیا. . جیرھا کئی ضروری تبدیلی دی ڳالھ کرے ہا، آہدے ہئین "بدعتی" ہے. . . . اینویں سوشلزم دے روسی اتیں چینی انقلابیں دے آوݨ سیتی وݙئیں کمیونسٹ پارٹیں مارکس اتیں لینن دے فرمانیں کوں اسمانی درجہ ݙے ݙتا ہر سوشلسٹ ریاست دے لیڈریں دے اتیں ایندی ہو بہو عملدرآمد کوں لازمی بݨاݙتا. .چنانچہ ریولیوشنRevolution تبدیلی کوں ݙکݨ اتیں مندا آکھݨ کیتے جیرھا لفظ ورتیا او ہا ریویژنزم Revisionism یعنی تبدیلی ہک مندا بݨ ڳئی."

ڈاکٹر احسن واگھا