باسط بھٹی

13 ویں "خمیس یاترا" 13 فروری 2014ء ۔۔۔۔۔ ملتان تیرہ فروری ڈوہزار چوڈاں یاتری حسب معمول الطاف ٹاون اچ واقع باسط بھٹی سئیں دے گھر جمع تھئے ۔یاتریاں وچ قیصر عباس، خالد اقبال ، مظہر عباس ، ذیشان ملک، مظفر بخاری ،سلمان سہو، عمران رجوانہ ، الطاف ڈاہر، شکیل احمد ، رفعت عباس، غضنفرعباس، احمد عقیل، عمر صدیق تے مہر مسعود امجدشامل ہن ۔ یاتریاں صلاح بدھی جو اڄوکی خمیس یاترا سرائیکی وسوں دے نینگر لکھاری سئیں محبوب تابش دے رہائش گاہ واقع محلہ باغبانپورہ نیڑے نواں شہر چوک ملتان اچ ہوونی چاہیدی ہے تانجوں سنگت ڄاݨ سڳے جو دیرہ غازی خان دی وستی گھمن یونین کونسل شادن لُنڈ دا اے نینگرشاعر ادیب اَتے صحافی سرائیکی ادبی سیاسی اَتے سماجی شعبے وچ ہن تک کیا کر چکے تے اڄ کل اووسوں دی سجاکی سانگے کیڑھا کم ستری پئے۔ سبھ توں پہلے ٹیپ ریکارڈ تے استاد حسین بخش خان ڈھاڈھی دی آواز اچ خواجہ فرید سئیں دا کلام سنیا گیا۔ اوندے بعد محبوب تابش اپنی ادبی سماجی اَتے صحافتی کم دے حوالے نال حال ڈتا۔ اوندے بعد انھاں اپݨے سفر نامہ "رول گابا" اچوں ڈوحصے پڑھ کے سنوائے ۔ پہلا حصہ سرائیکی وسوں دے اہم ضلع دیرہ اسماعیل خان دے علاقے شاہ عیسی بلوٹ تے کافر کوٹ دے حوالے نال ہا۔ڈوجھا حصہ ضلع راجن پور دے تاریخی قصبے ہڑند دے حوالے نال ہا۔ تابش سئیں دے سناوݨ دے انداز نال اینویں ڄاپیا جو یاتری خود وی انھاں انھاں جاہیں تے موجود ہوون جنھاں دا ذکر انھاں دے سفر نامے اچ آندا رہ گیا۔ ایندا اظہار سنگت سفر نامہ پڑھیجن توں بعد موقع تے کر وی ڈتا۔"رول گابا" دے حوالے نال یاتریاں دا آکھݨ ہا جو سرائیکی نثر اچ اے بہوں خوبصورت ودھارا ہے!

(از منیر بھٹہ جیسلمیری)