اُستاد عبدالشکور خطاط
روایتی لوک خطاطی و خوشنویسی اِچ ملتان دا ہِک ٻیا خانوادہ وِی ہِے ڄیں اِیں فن دی وݙی خدمت کیتی ہِے او اُستاد عبدالشکور خوشنویس دا خانوادہ ہِے۔ سئیں اُستاد عبدالشکور نے آپݨے چار پُتراں کوں وِی اے فن سکھا ݙتا ہَا۔ اِنہاں دا وَݙا پُتر ظہور آزاد ٻہوں سوہݨاں لکھݨ آلا خطاط ہا۔ روزنامہ اِمروز دے شعبۂ کتابت اِچ وِی خدمت انجام ݙتی اِمروز بند تھیوݨ دے بعد اِنہاں پل شوالہ تے ہِک دُکان اِچ مرکز کتابت بݨا ݙتا ہا۔ اے وݙا تخلیقی کم کرݨ آلا ہونہار فن کار ہا جوانی اِچ دنیا توں جھوک لݙا ڳئے۔
اِنہاں دے ٻئے وی کئی شاگرد ہِن پر ہِک وݙا ہونہار شاگرد راشد سیال ہِے ڄیں وݙا لاجواب کم کیتے اَتے خطاطی اِچ ہِک وَکھرا مقام حاصل کیتے۔
اُستاد عبدالشکور دے ٻئے پُتراں اسد اللہ، فیاض اَتے عارف مہدی نے خطاطی دا لوک فن آپݨے اَبّا جی توں سکھیا تے وَت ملتان شہر دے وِچ اتے ٻنہاں شہراں دے وِچ وی باقاعدہ خوشنویسی، کتابت کریندے رَہ ڳئے۔ اِیں طرحاں ݙٹھا ونڄے تاں اُستاد عبدالشکور سئیں نے ایں فن دے وَدھارے کیتے وݙا کم کیتا ہَا۔ اِنہاں دے پوترے محمد وَقار ظہور نے وَݙے فخریہ انداز اِچ ساکوں آپݨے خانوادے دِیاں فنی خدمتاں دے بارے اِچ ݙسایا۔
سئیں ابن کلیم احسن نظامی دے نویں ایجاد کیتے ہوئے طرزِ تحریر خط رعنا دا ہِک ایوارڈ یافتہ شہکار فن پارہ۔ قرآنی آیت ڈیزائن کیتی گئی ہِے۔ سِدھے پاسے آلے لفظ سدھے اَتے ریورس الفاظ دا ڈوجھی پاسوں عکس پووݨ نال ایں ڈیزائن نے ہِک مخروطی محراب دی شکل اختیار کر گھدی ہِے۔ ایکوں روایتی خطاطی دی اصطلاح اِچ ’’منعکس طغریٰ‘‘ یا ’توام‘‘ انداز دا طغریٰ آکھیا ویندا ہِے۔ اے فن پارہ آل پاکستان مقابلۂ خطاطی اِچ حکومتِ پنجاب دی طرفوں اوّل انعام گھن چکیا ہِے۔ اَتے ایندے بعد 1986ء اِچ پاکستان اِچ منعقد تھیوݨ آلے پہلے ’’بین الاقوامی آرٹ بینال‘‘ اِچ اعلیٰ نمائندگی دا اعزاز وی گھن چکیا ہِے۔ ایں فن پارے دا موضوع ہِے۔ ’’زمین اُتے فساد برپا کرݨ آلیاں کیتے وعید ہِے‘‘۔ اَتے سعودی عرب جدہ اِچ 2011ء دِی خطاطی دِی نمائش اِچ ہِک عربی نے اِبنِ کلیم کُوں خصوصی اِنعام ݙتا۔ [١]
ٻِیا ݙیکھو
لکھوحوالہ جات
لکھو- ↑ از: "ابن کلیم" "ملتان دے لوک فنون وِچ روائتی خطاطی دا ارتقاء" (١٩٧٠ء تُوں پہلاں)، باہتمام: دبستان فروغ خطاطی (رجسٹرڈ)۔ (غیر مطبوعہ سرائیکی مقالہ)۔