اوپریاں ٻولیاں دا ݙڈھپ

ریاستی مسلط تھئی ہوئی ملاں دی بولی کوں ماء بولی دے مقابلے اچ افضل تے مقدس سمجھنڑ آلیں سرائیکی وسوں دے لوکاں کوں اج دا جیہاڑا شرم نہ آئی تاں وت کڈھاں نہ اوسی۔ میکوں انھاں لوکاں تے ترس آندے جیہرے یا تاں عربی کنوں متاثر ہن ۔۔ یا وت بنہیں غیر مقامی زبانوں کوں ماء بولی تے مسلط کر تے پڑھے لکھے یا مذہبی ہوونڑ دا تاثر ڈیندن اے بئی گالھ اے جو عربی وی زبان ہے تے صاف ظاہر ہے ایکوں سکھنڑ چنگی گالھ اے لیکن عربی دے نال نال جیہرا ثقافتی حملہ مقامیاں تے مذہب دے ناں تے ملاں کیتے اوکوں توجہ نال ڈیکھنڑ دی لوڑھ اے۔۔ انگریز اتھاں آ کراہیں ساکوں یاد ڈیوائے جو تساں مسلمان ہندی کیوں الیندو لہذا عربی فارسی تے بیاں زباناں رلا تے فالودہ تیار کیتا گئے۔۔ او فالودہ اج ساڈی گچی دا گیڑ بنڑ کھڑے۔ ایں سارے معاملے اچ سندھی آپنڑاں دماغ استعمال کیتے آپنڑی ماء بولی واسطے الانڑے۔ تے ساڈی حالت اے ہے جو اساں لاہور کراچی پنڈی تے پرے لاتھن ملتان ڈیرے اچ وی اردو الیندوں تے اردو الا تے ترقی پسند ہوونڑ دی اکڑ کر کھڑدوں جو اساں دیہاتی نسے۔۔ پنجابی ہووے پشتو ہووے سندھی بلوچی یا اردو یا وت عالمی زبان انگریزی بہوں سوہنڑیاں زباناں ہن۔ لیکن جیکر کئی زبان تہاڈے اتے مسلط کیتی ویندی پئی اے یا کر ڈتی گئی اے تاں تہاکوں سوچنڑاں چاہیدا ہے۔ خاص طور تے بالاں کوں مقامی زبان سکھاؤ۔۔ تاکہ او خواب مقامی ڈیکھن تے مقامی زبان اچ سوچن تے انھاں دی سوچنڑ سمجھنڑ دی صلاحیت تیز تھیووے۔۔ بالاں تے انگریزی یا اردو مسلط نہ کرو ۔۔ اے تہاڈی کامیابی کینی بلکہ بال تے ظلم اے فطرت دا تقاضہ وی ایہو اے جو بال کوں مقامی زبان سکھالی ونجے۔ غیر مقامی آلی کار تھیونڑ دے چکر اچ بال دی مقامیت دا قتل نہ کرو۔۔ نہ تے بھوئیں تہاکوں کڈھاں معاف کینا کریسی۔۔

مظہر حسین