امید ملتانی
اصل ناں محمد نواز
قلمی ناں امیدؔ ملتانی
جٖمنْ 1923ء
جاہ پتہ ملتان جیولرز صرافہ بازار ملتان
سرائیکی اتے اردو دے نامور شاعر امید ملتانی دا17واں ورھیݨاں اج منگل 11فروری کوں منایا ویسی ۔ انہاں دا اصل ناں محمد نوازانصاری ہئی ۔ او 1922ءوچ ملتان دے علاقے بوہڑ گیٹ اچ جمیے ،انہاں دے ماءبولی سرائیکی ہئی لیکن امیدملتانی اردو اتے سرائیکی زبان کوں اظہاردا ذریعہ بݨایا۔ 1972اچ ” سرائیکی مجلس ادب“ دے ناں توں ہک تنظیم رجسٹرکروائی اتے ایندے تحت پندرہ ݙینھوار مشاعریں دا آغاز کیتا۔ انہاں دے ترائے شعری مجموعے منظرعام تے آئے جیں اچ ہک کتاب تے انہاں کوں وزرارت مذہبی امور دی طرفوں صدارتی ایوارڈ ݙتا ڳیا۔او 11فروری 2003ءکوں ملتان وچ اللہ کوں پیارے تھی ڳئے۔
سئیں امیدؔ ملتانی سرائیکی وسیب دے جٖاتے سنجٖاتے تے صدارتی ایوارڈ یافتہ بزرگ شاعر ہن۔ ادبی حلقیاں وچ آپ دی شخصیت قابلِ احترام سمجھی ویندی ہے۔آپ اجٖ کنوں تقریباََ تریہہ پینتری سال پہلے سرائیکی ادب دے فروغ واسطے سرائیکی مجلس ملتان قائم کر کے ماہانہ مشاعریاں دا سلسلہ شروع کیتا۔خاص طور تے سرائیکی غزل دی ترقی تے ترویج واسطے انہاں غزلیہ طرحی مشاعرے کروائے تے ول1972ء کنوں1973ء تائیں دے تھیونْ آلے مجلس دے مشاعریاں کوں مرتب کر کے ’’مینگھ ملھار‘‘دے عنوان نال ہک ضخیم کتاب شائع کیتی۔یقیناََ سرائیکی ادب واسطے اے انہاندا ہک بٖہوں وڈٖا کار نامہ ہے۔آپ دا نمونہ کلام ملاحظہ کرو!
غزل
لکھوجئیں ڈٖینہ دی سانول تَیں کنڈ ولائی ہے
گھر مونجھ کھلدی بے خوف آئی ہے
تَیں میں دی قسمت رب نے بنْائی اے
میں وچ فقیری ، تیکوں وڈٖائی اے
غیراں دے وانگوں دشمن توں تھی گٖئیں
اے پیڑ دل وچ ہردم سوائی اے
چشمِ فلک نے کئی وار ڈٖٹھے
شاہاں دے ہتھ وچ کاسہ گدائی اے
انسان کتنا نادان تھی گٖئے
پل دا وِسا نئیں دعویٰ خدائی اے
؎تیڈٖیاں خوشیاں دے پھُل بٖوٹے ہر دم باغ بہاراں
میڈٖے دل دے گٖلشن دیوچ نہیں تھیندی ہریالی
ہک ڈٖینہ باغ اچ کوئل کولوں دل کملا پیا پچھے
کَیں سوہنْے دے غم اچ تھی گٖئی تیڈٖی رنگت کالی
؎کئی پیاسے ودے اَہدن ملے ہک قطرہ شبنم دا
کنہاں کیتے چھلک ویندن کنارے خود سمندر دے
؎ناصح جو مئے خواراں دیوچ جُڑ بنْ کے آ بٖیٹھے
پہلے اپنْاں دامن ڈٖیکھے ول بٖئے کوں سمجھاوے
؎امیدؔ رکھ نہ پھُل دی توڑے بہار آوے
ہے زہر غم دا وُٹھا ایں آس دے شجر تے
٭٭٭