اشرف جاوید ملک

اشرف جاوید ملک نے بہاء الدین زکریا یونیورسٹی توں اردو تے سرائیکی وچ فرسٹ ڈویژن ایم۔اے ا تےاین سی بی اینڈ ای کالج توں اردو وچ ایم فل کیتا ہویا ہے۔اوہ جدید سرائیکی نظم تے گیت دے معروف شاعر تے لکھاری ہن ۔

نمونہ کلام

ساوݨ آ ڳئے

ساوݨ آ ڳئے کھجاں دا ُ ُمکھ

ساوا تھی گئے

ساوے ُ کچ ہن واڑ

ِ پنڈ پک ڳئی اے

ِ ِ تل ُ پھل چئی پئن

وسݨ کار ِ ِہن ماڑ

دریا خوش ہن

ساوݨ آ ڳئے

ٙ ٙ تل وسیب ہوا دی شوخی

وچِ ِ گھماٹ اے

چندر چناب اچ دھاوݨ آڳئے

نظم

ول بھا ہ لگ گئ ہے

لہجے دے مسماء دے

وچوں

ِ ِ چخاہ نکلیئے

ڈو جی

بولئین

بھاء لگ گئ ہے

وس وسیب دے

شہر قبولے

بکھ تریہہ توں ُُ

ُ ُ کونجاں مرگئین

مظلومیں دے ساہ دے

وچوں

ِ ِ ِ چخاہ نکلیئے

بھاہ لگ گئ ہے

ُ ُ ُ سکیاں جھیلاں دا

تل ُ رنے

اپݨیں حالت دے

تھل ُ رنے

روپے دے مُل کوں

شہیں،سوچاں،رشتیاں،

رتاں ،

یار ملݨ دے ہر موسم کوں

بھاہ لگ گئ اے

لوک مقامی ،غیر مقامی

فرقہ ،مذہب

قوم قبیلہ ، تو کیا ?

میں کیا ?

انساناں جو فرق ورادھن

انسانیں دے

نفع والے ہر ہک کم کوں

بھاہ لگ گئ ہے

کھیر تاں کھیر ہئ

چھاء پھٹ گئ ہے

چھاء دے وچوں

ِِ چخاہ نکلیئے

بھاہ لگ گئ ہے

بھاہ لگ گئ ہے

اشرف جاوید ملک

غزل

محبت سانگے

اپݨیں اندر دا ودھایا ہویا ڈر کھاندا ِھم

تیڈے ویہڑے دا ولایا ہویا در کھاندا ِھم

شہردی بھیڑ دے وچ کوئ سنجاُپوکاِئنھم

گھردےِوچِ پیررکھینداہاں تاں گھرکھانداِ ھم

ویلہاہوواں تاں شریکاں دے سہاپ ِہن ُسنج اے

دنیا ماݨاں تاں کمایا ہویا زر کھاندا ِھم

ِ گھنآں دریا دا ِکنارا تاں ُبڑیندئم پاݨیں

ریت وچ ُٹراں تاںُ دھپاں دا بھنور کھاندا ِھم

گالہہ ُ کوڑی جو کراں لوک منافق آہدئیم

سچ بولیندا ہاں تاں وستی دا ِشمر کھاندا ِھم

وسیب واسیاں کیتے ہک نظم

رات دھمݨ تئیں سینے اندر

پوہ دا پالا وسدا رہندے

کوٹھے اندر کچی کندھ دے

مکھ موئیاں دا ہسدا رہندے

جیوݨ شال ہنڈھاوݨ لازم

تن اپݨیں کوں کجئی راہنداں

مُونجھیں دا پݨیال دھمی تئیں

اکھیں وچوں رسدا رہندے

سئیت ہے اٹھ ڈینہواری جھڑی

چڑھ اسمانیں کھڑ ویندی ہے

بھانویں جیڈے منتر پڑھوں

ُمشکی وانگوں لڑ ویندی ہے

خوابیں دیاں ست رنگیاں چیڑیاں

ہولے ہولے مردیاں ویندئین

جنگل سوڑے تھیندے ویندئین

دریا ُسکدے ُمکدے ویندئین

ُرت بدلݨ دیاں آساں اشرف

روہی وانگ ِودھردیاں ویندئین

پیپل جالہہ شرینہہ تے بوہڑیں

ہک جہاڑے ڈِھگ تھی راہسن

دشمن دار ماحول دے ہتھیں

اندریں اندر پنگھردیاں ویندئین

واندھ چنانہہ تے سندھ دریا دی

ُسک گئی تاں وت کیویں جیسوں

رڑھیں ڈنگر ڈھور نہ رہسن

جے ساڈے دریا نہ وہسن

کتھوں مٹھڑے پاݨیں پیسوں ؟

اللہ کرے ایں نہ تھیوے

دریا ُسکئین '

جنگل ُمکئین

ہسدی ِکھلدی وسوں ساڈی

ڈوجھا چولستان نہ بݨے

آوو آپݨیں مینہ دی خاطر

چیلک والے ڈینہہ دی خاطر

سُورج ُمکھی تھی کے سوچوں

نویں لیکھ دے ِسجھ کوں لوچوں

اپݨیں دریا چارھے کروں

شہراں دے وچ جنگل لاءوں

جنگل دے وچ منگل لاءوں

اشرف جاوید ملک

بی بی سی لندن (سرائیکی افسانہ)

چاچا نورا ڈو بینڈ دا سعودیہ آلا ریڈیو کچھ اچ پا کے دیگر نال بی بی سی دے ٹیشن دیاں خبراں دا تانگھی تھی ونجے ہا، ڈاند رہڑی ودھا ،ڈاند کیکر دی چھاں تلے بدھ کے پالہا تھیوݨ بعد ،پہلے آل انڈیا ریڈیو دی اردو سروس ،لتا تے رفیع دی آواز ، پیارے لال تے آر ڈی برمن دیاں دھناں تے طبلے دی سنگت چاچے نورے دی ٹالی تلے سٹی ہوئی منجی ، پگو دے واندھے پاݨیں دے نغال دیاں موسیقی دے ُ سر کھنڈیندیاں اوازاں ،بالہاں دا ککاریاں مریندیں ہوئیں وݨاں تلے ہک بئے دے پچھوں دھروکڑیاں لاوݨاں ،ایں سارے ماحول کوں انڈین گیت گرماون ہا ،تے چاچا نورا سراݨاں سر تلے رکھ تے سمے ہا ، کچے امب پھودنے ،ساویاں مرچاں تے ٹماٹراں دی چٹݨی ،ہک ڈو پیلے پکے پکے خربوزے تے کچے وصلاں دا نبو دے رس آلا سلاد ،مکھݨ نال چوپڑیاں ہوئیاں او روٹیاں جہڑیاں چاچی فضلاں دھمی ویلے تنور بال کے پکائیاں ہن ، ترے وجے ڈینہہ کوں ہک چنگیر اچ جڑئیاں ہوئیاں چاچےنورے دے سامݨے ہوون ہا ، چاچا چوپڑیاں روٹیاں آلے تھندے ہتھ نال مچھاں کوں ُ کولا ہتھ مار کے انگلیں دا مروڑا ڈیوے ہا تاں ایویںں لگئیے آ جو ایں پرے تئیں دگری وستی اتے چاچے نورے دی حکومت اے ،وستی اچ صرف ہوندے کول ای ایہو جیاں ڈبہ ہے جہڑا بی بی سی دے ناں نال سچیاں خبراں سݨویندے ،حق سچ پاروں اے ریڈیو کلہا سپاہی اے جہڑا امریکہ دے چٹے کوڑاں دے خلاف ڈاہڈی جنگ لڑدے ، چاچا نورا بی بی سی کوں غریب ملکاں دا خیرخواہ سمجھدے ،پوری دنیا اچ امن اے ، 65 دی جنگ ،اسرائیل تے فلسطین دے قبضے وچ پھتھے علاقیاں پاروں تھیوݨ آلے تنازعے ، کوئ ہلکے ہتھیاراں نال فائرنگ داواقعہ ، پر اے معاملے وی چاچے کیتے بہوں اہم ہن ،او فلسطین کوں آزاد ڈیکھݨاں چاہندے ، اسلامی ملکاں کوں ہک مٹھ ڈہدے تے کشمیر دے معاملے کیتے بے چین اے ،گاوی لسی دی گڈوی پی کے ،او تسلی دا ڈکار ڈیندیں ہوئیں ،شور کریندے بالاں کوں دڑکا چڑھیندے ،تاں بالہہ گھراں در ُدوس لیندئن ،دیگر 6 وجے ریڈیو دی سوئ 1035 کلوہرٹز دے آندی اے ،ملتان دے سٹیشن توں ،مہر تے ملک دا پروگرام ۔۔جمہور دی آواز لگ ویندے ،چاچا منجی سراݨاں تے ریڈیو چیندا ، گھر دے کچے حویل دے وڈیل سرے دے کھٹ سٹ کے پروگرام سݨدے ،چاچا عاشق، چاچا محمد حسین ،چاچا فیضو تےاساں چھوہر چھٹکر ریڈیو دے نیڑے آ لگدے ہیں ، جمہور دی اواز بعد ،ڈرامہ لگسی ،،،نکا کاکا ،وڈا کاکا ،، زنانیاں چلہاݨے دے چوکیاں اتے بہہ کے حال حویل دی بیٹھیاں سریندئین ،، اہم گالہہ چاچے نورے دے پتر ،،ِ میرے ،، تے اوندی سوتر بختو دے رشتے دی اے ، ِ میرا،، بختو دا دیوانہ اےتے بخت وی اوکوں پسند کریندی اے ، پر چاچے نورے دے وڈے بھرا ،شبیرے کوں ،بختو ،،ہک اکھ نی بھاندی ، کیوں جو او بختو کوں ، ،ِ ِ میرے ِ،، دے مقابلے وچ ان پڑھ تے آواری سمجھدے ، ِمیرا ،ڈاہ جماعتاں پاس اے تے او خودکوں ہݨ امیر بخش سڈیجݨ پسند کریندے ،،،تے بی بی سی دے پروگرام سیربین ،،، بارےاوندے تبصرے ساری وستی وچ منئیے تے جاݨیئے ویندئین ،،، وڈی حویلی اچ کھٹاں سٹیج گئین ، ڈنگر ڈھور بھاݨیں بدھ کے ، ِ میرا ،گھر دی چھت دےکھٹ گھت کے ستا پے ، پاݨیں دا وارہ بدھݨ کیتے کہی کول پئ اے ،بارہوں باغ آلے پاسوں ِ گدڑاں دیاں اوازاں ہن ، کتے بھونک بھونک ِ گدڑاں کوں ڈریندے پیئن ، رات دے ہک وجے دا ویلا اے ، گھر دے بارہوں باغ اچوں رووݨ تے دھاڑ بڑنڈ دی اواز اے ، چاچا نورا ڈانگ چا مچھ کوں وٹ ڈیندا ،منجھلی دی ٹیبک بدھیندا باغ آلے پاسے بھجا ویندے ، بختو دے رووݨ دی اواز اے ، پر اتھاں کوئ بیا بندہ نی نظر آندا پیا ، بختو ، امب دے گھاٹے گھیر آلے پاسے اشارہ کر کے دھاڑ کیتی اے ،،،، ہائے اللہ میں ُ لٹیج گئی آں ،،، چاچے نورے امب آلے پاسے ڈانگ بھنوائ اے ، ِ میرا کوٹھے دی چھت دوں درک مار کے بھجے ، چاچا نورا بھوئیں دے ڈٹھا پئے ، ڈڈھ وچوں خون پیا سمدے ، چاچا دے چھیکڑی ساہ ہن ، زنانیاں ویݨ پیاں کریندین ،، کئ بندہ تکھے قدمیں بھجدا ہویا ، باغ اچ گم تھی گے ، جیندے ہتھیں ،ایں وستی اچ پہلی واری لوکیں بندوق ڈٹھی اے ،،، وستی دا پہلا بندہ گولی نال مارئیا گئے ، گولی چلاوݨ والا چاچے شبیرے ،کنوں علاوہ بیا کئ نی تھی سگدا ،،، پر ، ہک گالہہ بہوں عجیب اے ، ،ِ میرے دا سوتر چاچے شبیرے دا پتر ،، بہوں گھابرئیا ہوئے ،،، وستی دے سارے لوک اے جاݨدئن جو چاچا شبیرا بندوق چلاوݨاں نی جاݨدا ،،،،، میرا ،بختو ،،،تے سارے گھر آلے چپ ہن ، وستی چپ اے ،، چاچے شبیرے دی اواز نی پئ نکلدی ،،، وزیرا دھاڑیں مار مار کے روندا پے ،،،، بی بی سی توں رات دا چھیکڑی بولیٹن ،،،پشتو وچ نشر پیا تھیندے ،، دا لندن دا ، دا بی بی سی دا چلنڈو پرستوخ پاراوانا دا ، دئ دا مخپریجی ،،،،، پر اج چاچا نورا چپ اے ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ اشرف جاوید ملک