ابوسفیان بن حرب

قبیلہ قریش دی اموی شاخ دے ہک سردار ہن۔ پورا ناں صخر بن حرب بن امیہ. ابوسفیان کنیت اے. مکے وچ پیدا تھئے۔ آنحضرت توں چند سال وݙے ہن۔ مدت تک اسلام دی مخالفت کریندے رہے۔

حالات

غزوہ بدر تے غزوہ احد دے معرکیاں وچ نبی اکرم صلی اللہ علیہ و آلہ وسلم دے خلاف جنگ لڑی۔ ول ہک لشکر جرار گھن کے مدینے تے چڑھائی کیتی مگر مسلماناں نے مدینے دے گرد خندق کھود کے حملہ آوراں دے عزائم ناکام بݨا ݙتے۔ ابوسفیان نے حدیبیہ دے مقام تے صلح کیتی۔ مسلماناں نے مکے تے چڑھائی کیتی تاں ابوسفیان نے شہر نبی اکرمؐ دے حوالے کر ݙتا۔ نبی اکرمؐ نے مکے وچ داخل تھیندے وقت اعلان فرمایا کہ جیہڑے لوگ ابو سفیان دے گھر وچ پناہ گھنسن ، انہاں توں تعرض نہ کیتا ویسی ۔ ابوسفیان کیتے ایہ بہت بڑا اعزاز ہئی۔

فتح مکہ تھیوݨ دے بعد حلقہ بگوش اسلام تھی گئے۔ قبول اسلام دے بعد غزوہ حنین تے ول جنگ طائف وچ حصہ گھدا۔ آخر الذکر جنگ وچ انہاں دی ہک اکھ ویندی رہی۔ حضرت عمر دے عہد وچ شام دی مہم وچ شریک تھئے تے اس دے بعد جنگ یرموک وچ، جس وچ ݙوجھی اکھ وی ویندی رہی۔ مسلماناں دے اموی خلیفہ امیر معاویہ، ابوسفیان دے بیٹے ہن۔ ابوسفیان، نبی اکرمؐ دے سسر وی ہن۔