آݙو بھگت

روھی تے ساݙے وسیب ءچ فریدݨ سئیں دیاں کافیاں ڳانوݨ والے ھک ٻہوں وݙے فن کار دی موت ـ لوک موسیقی دا ھک ٻیاء باب بند ـ ...وݙا آݙو بگھت وی ٹُر ڳئے ـ ـ حضرت خواجہ غلام فریدؒ سئیں دیاں کافیاں ڳانوݨ والا روھی دا ٻہوں وݙا فن کار تے نامور صدارتی ایوارڈ یافتہ گلوکار فقیرا بھگت سمیت ،،روھیلے گلوکاریں ،،دا استاد سادہ دل تے بے ضرر انسان آݙو بھگت جھوک لݙا ڳئے ـروھی ءچ خواجہ سئیں دیاں کافیاں ڳانوݨ والا اپڑیں فن ءچ بے مثال تے یکتا فن کار دی موت نال فقیرا بھگت دے بعد لوک موسیقی دا ھک ٻیاء باب وی بند تھی ڳئے ـ آکھیاء ویندے جو موسییقی روح دی غزا اے تے بلا مزھب ،رنگ ،نسل ھر قوم قبیلے تے ریاست ءچ ایندا اپڑاں رنگ اے ـ آݙو بھگت وݙا ھووے یا آݙو بگھت چھوٹا فقیرا بھگت ھووے یا اوندا جانشین تے پڳ دا وارث موھن بھگت اے او لوک ھن جنہاں روھی ءچ رھندیں ھوئیں اپڑیں روھی دے ساز بنڑائن اپڑیاں سُراں تے دُھناں بنڑائین ـ اے او لوک ھن جنہاں کہیں ٻی ݙوجھی ثقافت یا دور جدید دی بے ربط تے بے ھنگم موسیقی تے سازیں دی نقالی نہیں کیتی تے فریدݨ سئیں دے اکھاݨ مطابق ،،اپڑیں نگری آپ وسا توں ،،تے عمل کریندیں ھوئیں فطرت تے حقیقت دے نال نال ٹُردے پئین ،حکومتی سرپرستی نا ھونوݨ دے باوجود ،سرائیکی قومیتی ثقافتی تحریکیں دے اڳوانڑیں دی بے غوری تے عدم توجہی دے باوجود اپڑیں مستی ءچ مست اے لوک اپڑیں نگری آپ وسائی پئین ـ تحصیل لیاقت پور دے شہر فیروزہ کنوں پل چک 37،،کنڈا خواجہ والا ،،جھوک فریدؒ جتھاں خواجہ فرید ؒ فاونڈیشن دی طرفوں. فروری مارچ ءچ سالانہ روھی اـمن میلہ وی تھیندےـ اوندے نال ای اے لوک وسندڑ ھن ـ سادگی شرافت تے مہمان نوازی ءچ وی کمال رکھدن ـ وݙے آݙو بگھت دے جھوک لݙاوݨ تے انہاں دی پوری برادری ،سنگت ساتھ ،شاگردیں تے خاص طور تے موھن بھگت نال ارمان کریندوں. آمدݨ خیر دی ھووے ،شالا خیر ـ وسدی رھے فریدݨ سرکار دی رنگ رنگیلڑی روھی تے نِت شاد تے آباد رھن روھیلے ـ جیوے سرائیکی وسیب

سورگ باشی آڈو بھگت سینئر دی مکاݨ

شاعر صوفی تاج گوپانگ

۔

توں گائیک ساڈے وسبے دا گر سر دا پکا

توں استاد دلیں دا

تیڈے گیتیں دی چس رس ھے

پکھیاں دے چلکارے وانگوں

بھگت فقیر کوں اینجھی کافی جھول پلایو

اینجھی رمز ڈسایو اونکوں

ہند سندھ وچ مشہور تھیا او

اوندی کافی دے ہر انگ دا

لڳا جمل جہان اچ نعرہ

سݨ حیران تھیا جگ سارا

سن 47 دی بھاجڑ وچ قدم ٹکائے تیں

پیر فرید دے کنڈے کوں تیں کنڈ نہ کیتی

وسبے دی درسال نہ چھوڑی

دھرم نہ چھوڑیا بھرم نہ ویچیا

لاج رکھیو اپݨی پیڑھی دی

تیڈے من وچ وسدے ریہے

پیر ، پتھورو ، مرشد ، رامے

صوفی دا ایمان پیا اوں توں اکھواوے

نرگ تے نار حرام اوں تن تے

جیں ہک کافی خواجے سئیں دی نال سرود دے ڳانوی

کیوں جو کافی غنچا ھے ہک باغ ارم دا

کافی ھے الہام عجم دا

متراں کوں مویا آکھݨ وی دل نئیں اہدا

موت فرشتہ ازل کنوں ھے زندگی دا بے رحم شکاری

ایندا وار تاں ہر وزبر تے ضرب ھے کاری

اے کئی گیت سنگیت نہ ڈیکھے

میت پریت نہ ڈیکھے

ہار تے جیت نہ ڈیکھے

رات کوں راخس روپ بݨا تے

موت مریندی دھاڑے

سجھ ابھریے تاں بݨ میراثݨ گھر گھر نچے

ساہ دی ویلھ اگاڑے

وفات

١٩ جنوری ٢٠٢٠ ء