آگرہ

آگرہ
آبادی:	1,585,704
زبان:	ہندی، اردو
علاقہ :	اتر پردیش، بھارت

آگرہ ہندوستان دی شمالی ریاست اتر پردیش دا اہم شہر ہے۔ ایندا پراݨا ناں اکبر آباد ہئی۔ مغلیہ دور بالخصوص شہنشاہ جلال الدین محمد اکبر دے زمانے اچ ایہ دار السلطنت رہیا ہے۔

تاریخی مقامات

آگرہ دنیا دی مشہور تے خوبصورت عمارت تاج محل کیتے جانا پہچاݨا ویندے ٹے اتھاں شہنشاہ جلال الدین محمد اکبر دا تعمیر کردہ لال قلعہ وی قائم ہے جیہڑا ہک خوبصورت تے وݙی عمارت ہے ۔ آکھا ویندے کہ ایہ عمارت دہلی دے لال قلعے توں وی زیادہ وسیع ہے۔ ایں عمارت دے اندر فرصت دے نال گھمݨ تے اتھاں دی بہت ساری حیران کن چیزاں نال تعارف تھیندے۔ پورے لال قلعے کوں سرعت دے نال گھمݨ کیتے چار پنج گھنٹے درکار ہن۔ دہلی توں پہلے ایہو شہر جلال الدین محمد اکبر دا دار الحکومت ہوندا ہئی۔ اتھاں متعّدد برجیاں قدیمی آثار دی بݨے ہوئے ہن تے ایں شہر دی تاریخ بیان کریندن۔ اتھاں شاہجہاں تے سکندر دی تعمیر کردہ کئی خوبصورت عمارتاں ہن جنہاں اچ فتح پور سیکری سکندرا دیوان عام، دیوان خاص سر فہرست ہن۔ اتھاں قدیم زمانے دی تعمیر شدہ کئی مساجد ہن جنہاں وچوں شاہی جامع مسجد اڄ وی اپݨی پوری آب و تاب و خوبصورتی دے نال ہک مسلمان دا دل موہ گھنݨ دی صلاحیت رکھدی ہے۔ آگرہ توں چالیہہ کلو میٹر دے فاصلے تے ہک شہر فیروز آباد وسا ہویا ہے جتھاں ونگاں دے کارخانے ہن جنہاں دے دھویں دی وجہ نال تاج محل دی عمارت کوں کافی نقصان پہنچدے۔ گورنمینٹ انہاں کارخانیاں کوں گیس نال چلاوݨ دا انتظام کریندی رہی تاکہ تاج محل دی خوبصورتی کوں قایم رکھا ونڄ سڳے۔ ایں ڳال دے پیش نظر حکومت نے جتنے وی فیکٹریاں تاج محل دے آس پاس ہن انہاں کوں ختم کروا ݙتے۔