کوثر جتوئی

اصل ناں       عطاء محمد

قلمی ناں       کوثرؔ جتوئی

ڄمݨ           1938ء

تعلیم           مڈل

جاہ پتہ         جھڳی والا تحصیل جتوئی ضلع مظفر ڳڑھ

کوثر جتوئی 1938ء کوں نواب خان دے گھر ،جھڳی والا تحصیل جتوئی وچ پیدا تھئے،مڈل تک تعلیم حاصل کیتی ، شعر و شاعری دا شوق بچپن توں ہا پیا۔یتیمؔ جتوئی توں اصلاح گھدی ،شاعری دیاں تقریبََا ساریاں صنفاں تے طبع آزمائی کیتی ۔ڈپٹی کمشنر مظفر ڳڑھ مسعودکھدر پوش نے اپݨے زمانے وچ اعزازی سند پیش کیتی۔ایجو کیشن آفیسر مظفر ڳڑھ کنوں 1970ء وچ ٹرافی حاصل کیتی۔غزل دے حوالے نال آپ دی ہک لمبی بحر دی غزل ملاحظہ تھیوے!

غزل

کئی ایجھاں قسمت دا فیصلہ تھئے نہ دل توں مونجھیں دا بار ویندے

جے نندر آوے تاں خواب دیوچ او رات میں کن گزار ویندے

ہوا مخالف تے گھاݨ وچ ہے ، ملاح وی میکوں جواب ݙے ڳئے

عجیب منظر نظردے میکوں ، نہ ٻُݙدے ٻیڑا نہ پار ویندے

میں نا امیدی دیاں پَٹ کے کندھاں جو سال دیوچ ڈھہا چھُڑینداں

چمن امیدیں دا وت ولا او جھمکدی اکھ وچ اُسار ویندے

نواں شکاری ہاں احتیاطََا خموش ٻیٹھا سٹینداں چوڳاں

چلاک پکھی دے پیش پئے ڳیاں جے کرّاں پھاکا شکار ویندے

عجیب ٻنّے سواندری ہے میں اَہدا کجھ ہاں کریندا کجھ ہے

میں اپݨے ݙکھیں دے حال ݙینداں ، او اپݨی جُتّی جھلار ویندے