کاروبار

میڈے سوھنڑے مُلک پاکستان ءچ انویں تاں ہر کاروبار فائدہ مند ھے او کاروبار سیاست ھووے ڈاکٹری ھووے، پرائیویٹ تعلیمی ادارے ھوون، میڈیکل سٹور تیں جعلی دوا ھووے، بلیک میل صحافت ھووے، تساں کہیں وی شعبے ءچ کارو بار کرکے ترقی کر سگدے ھاؤ، مگر انھیں توں بہوں وڈا کاروبار ہے جیرھا میڈے ملک ءچ سب توں زیادہ منافع بخش ھے، او کارو بار ھے لاشیں دا، جی ہا حضور، تساں آپڑیں کہیں پیارے دی لاش ویچ کے لکھاں کروڑاں کما سگدے ھاؤ، کجھ مہینیں پہلے تہاکوں یاد ہو سی کوئیٹہ ءچ ھک پولیس انسپکٹر کوں ھک جاگیردار نے جانڑ بجھ کے گڈی دے تلے ڈے کے مار چھوڑیا ہا.

کجھ ڈینھ ساڈے وسیب ءچ میڈیا تیں کافی شور شرابا تھئے، اینویں شور شرابا ھر قتل دے بعد تھیندے، مگر کجھ ڈینھ دے بعد بلکل خاموشی تھی ویندی ہے جیویں کجھ تھیاء وی نہ ھووے، کیونکہ مقتول دے وارث لاش دی قیمت زیادہ گھنڑ دے چکریں ءچ ھوندن قاتل گھٹ کراونڑ دے چکر ءچ ھوندے،آخر کار ڈُھائیں لوک راضی تھی کے ھکو بیان ڈیندن کہ مرنڑ آلا مر گئے اساں راضی ھئیں، اتھاں لاشاں وکدن ضمیر کیرھی بلا دا ناں ھے ،اتھاں دین وکدے، انسان کیرھی شئے ھے، اساں او بے عقل قوم ھئیں جیکوں ھر مداری تماشہ ڈیکھا کے لٹیے، کہیں بے دین دین دا ناں گھن کے لٹیے، کہیں لفنگے شرافت دا ناں گھن کے، کہیں لٹیرے انصاف دا وعدہ کرکے لٹیے، کہیں چور ڈاکو خود کوں مظلوم بنڑا کے، کہیں بھنگی چرسی ڈوھڑے غزلاں کوں امامیں دی شان بنڑا کے جیباں بھرئن، کہیں کنجریں سرخی پوڈر لاء کے سر تیں بوچھنڑ پاء کے ساکوں دین دا سبق ڈتے، کہیں چبل واھیات قسم دا بندہ عامر لیاقت جھئیاں اوں ساکوں صراط مستقیم دا راہ ڈیکھلائے، کہیں منبر رسول تیں بیہ کے مندے کڈھنڑ جائز قرار ڈتے، کہیں مولانا ھر چور ڈاکو دا ساتھ ڈے کے ھر حکومت ءچ مزے گھدن، ،،،تیں اساں جی اساں وی ہر اندھی منجھ دا پوچھڑ پکڑیے متاں پرلی کندھی پہنچوں کائینا میڈا ویر ساڈے مقدر ءچ کنارے کائینی، ایھے (گڑُٹیاں)ہن جیرھیاں ملدیاں پئین.