ڈاکٹر رانا پُرتاب گنوری

اصل ناں      رانا پُرتاب سنگھ

قلمی ناں       رانا پُر تاب گنوری   

جمن           1938ء   

تعلیم           ایم اے ،ادیب فاضل

پیشہ            ریٹائر پروفیسر  

فون نمبر         ۔۔۔۔۔۔۔

جاہ پتہ          موجودہ ،دلّی (انڈیا)

رانا پُرتاب گنوری 3جون1938ء کوں جہان پور(جتوئی) ضلع مظفر گڑھ اچ جے منی لال بھوتانی دے گھر پیدا تھئے۔تقریباََ چوتھی جماعت پڑھدے ہن جو 1947ء کو ں ہجرت کر کے اپنے والدین نال بھارت چلے گئے۔اُتھ ونج کے وی، ایس ہائی سکول راجلو گھڑھی توں 1953ء وچ میٹرک کیتا۔تے ول انٹر میڈیٹ دے بعد جے ، بی ،ٹی سنٹر سونی پت توں ٹیچنگ ٹرینگ حاصل کر کے 1959ء توں تدریس دا آغاز کیتا تے نال دے نال اپنی پڑھائی وی جاری رکھی۔جڈاں جو 10سال دا عرصہ دلّی دے مختلف سکولیں وچ اپنے تدریسی فرائض سر انجام ڈتے ۔تے نال 1964ء وچ دلّی یونیورسٹی توں ایم اے دی ڈگری وی حاصل کیتی،تے نال ترقی پاکے 1971ء وچ آر ،کے، ایس،ڈی کالج کیتھل (ہریانہ) وچ بطور لیکچرار مقرر تھی گئے۔کالج وچ آکے تقریباََ 26سال تعلیمی خدمات سر انجام ڈتیاں تے آخر 3جون 1998ء کوں پی،جی کالج کیتھل توں ریٹائر تھی گئے۔ جتھوں تک رانا پُرتاب گنوری دی شاعری دا تعلق ہے تاں 1956ء توں انہاں اپنی شاعری دا آغاز کیتا۔ ناز سونی پتی،منو ہر لال تے سر شار سونی پتی توں اصلاح گھدی ۔شاعری دے نال نال انہاں نثر نگاری یعنی تذکرہ نویسی،منظوم تراجم،لغات، سفر نامہ (پاکستان1997ء)تالیفات (دیوناگری)تے بئے مختلف موضوعات تے آپ دیاں 20کتاباں چھپ چکیاں ہن۔ تے بہوں سارے اعزازات وی حاصل کر چکے ہن۔

(1)غزل

زندگی ساری میں اپنی آپ ہی گالی کھڑا ں

ایویں لگدے آستیںوچ نانگ میں پالی کھڑاں

آندیں ویندیں جیَندا جی چاہوے کرے روشن چراغ

میں چو راہے تے محبت دی شمع بالی کھڑاں

تُسّاں بھانویں پئے ڈکھاوو کینجھے کینجھے سبز باغ

ڈیکھدا پیاں سارا منظر اکھیں میں بھالی کھڑاں

بے رخی دے نال بے شک تَیں میکوں ٹھکرا ڈتے

آس رکھ کے تیڈے در تے ڈیکھ میں حالی کھڑاں

نا موافق ہن میڈے حالات رانا ؔکیا کراں

کِتّی کم اینجھے کرن دے ہن جو میں ٹالی کھڑاں

(2) غزل

ونج توں اپنے دھندے لگ

چھیڑ نہ میڈی ڈکھدی رگ

دھن دے گھر کئی شادی ہے

سارا شہر جو ہے جگ مگ

کوڑ بتوڑ دا رستہ چھوڑ

پکڑ سچائی  والا  دگ

نیتاں ساڈیاں ڈانواں ڈول

جَنتا تھی گئی ہے ڈگ مگ

توں میکوں سمجھیں انجان

میں جاناں تیڈی رگ رگ

کوڑے جگ کوں جان نہ سچ

راناؔ میڈے آکھے لگ

_______________________________

کیا لاتھے ہیں جہان اچ اگوں دی سوچ راناؔ

اے نال کجھ نہ ویسی ماڑی، مکان، مڈی

٭٭٭