چِیکِل
چِیکِل
اے کھیݙ چار توں اٹھ ٻال کھیݙ سڳدن. ایندے وچ ݙو لکڑ دے وݙے لڑوٹیاں دی لوڑھ ہوندی ھ. ہک لڑوٹا تقریبا ݙاہ فٹ دا ہوندے تے ٻیا پنج فٹ دا اوندی موٹائی وی چنگی بھلی ہوندی ھ. ایں کھیݙ وچ ٻالیں دیاں ݙو پالٹیاں ہوندین. ٹاس یا بجھارت توں باد جیتݨ آلے کھیݙدی ھ تے ݙوجھی واری ݙیندی ھ. پر ایں توں پہلے چھوٹے لڑے کوں دھرتی وچ ݙو فٹ جتلی پور ݙتا ویندے. تے وݙے لڑے کوں ادھ وچ ادھ تک کھݙ بݨا تے بھوئیں وچ پورئیے ہوئے لڑوٹے تے فٹ کر ݙتا ویندے. جیہڑا لڑوٹا دھرتی وچ پوریا ویندے اوندا سرا کھنھ تے یا چھل تے گول شکل وچ بریک کیتا ویندے ول ݙوجھا لڑوٹا فٹ کیتا ویندے. ول ٻجھارت جیتݨ آلی پالٹی اوں لڑوٹے تے سوار تھی ویندی ھ. ݙو لڑے دے ہک پاسوں تے ݙو ݙوجھے پاسوں ایں طریقے نال ٻاہندن جو وزن برابر راہوے. اوں توں بادبجھارت ٹاس ہرݨ آلی پالٹی اوں لڑے کوں گول گول گھمیندی ھ.اے لڑا ایویں گھمدے جیویں میلے تے ہاتھی گھوڑیاں آلا پنگھوڑا گھمدے. سوار پالٹی وچوں جݙاں کئی ہک کھݙکار تلے ݙیھ ونجے یا کپتان روکے کہیں وی وجہ توں تاں ول ݙوجھی پالٹی سوار تھیندی ھ تے پہلی اوں چیکل کوں گھمیندی ھ. ایں کھیݙ کوں ٻیا مزیدار کرݨ سانگے اوں پورئیے ہوئے کلے اتے کورکھ تے وی وݙا لڑا فٹ کیتا ویندے جیندی وجہ توں اتھوں چیں چوں یونی چیکیں دی آواز ودھ ویندی ھ. جیندی وجہ توں شئیت ایں کھیݙ کوں چیکل آکھیا ویندے.اے کھیݙ دیہات دے ٻاک زیادہ تر چاندݨی راتیں وچ کھیݙدن